Nominadonan pa Krus di Mérito 2019 - Informashon tokante Gobièrnu di Kòrsou Bo opinion

Notisia

Nominadonan pa Krus di Mérito 2019

Geplaatst op 13 June 2019 dor di Ministerio Enseñansa, Siensia, Kultura & Deporte

Willemstad – Riba 13 di yüni Minister di Enseñansa, Siensia, Kultura & Deporte sra. drs. Marilyn Alcalá-Wallé a hasi e pregunta na 5 kandidatonan ku a keda presentá pa risibí un kondekorashon di Krus di Mérito, si nan ta akseptá pa keda kondekorá ku un Krus di Mérito riba 2 yüli próksimo.

Sektor di Kultura i Deporte a risibí mas ku 40 petishon e aña akí i Komishon Krus di Mérito tabata tin un trabou masha duru pa hasi un eskoho den e kandidatonan ku a hasi trabounan meritorio pa nos komunidat durante di e trayektora di nan bida. Despues di presentá e eskoho na Konseho di Minister e komishon a risibí e aprobashon i ta anunsiá ku e 5 nominadonan pa risibí Krus di Mérito 2019 ta: Sra. Ange-Marie Jessurun, Sr. Oswin (Chin) Behilia, Sra. Swinda Marcela Albertus, Sra. Iva Hooghuis-Martina i Sr. Wendell Prince. Kada un di e personan akí a hasi trabounan meritorio i di forma boluntario pa komunidat di Kòrsou den vários área.

Ku hopi orguyo nos por bisa ku kada un a akseptá pa risibí e kondekorashon Krus di Mérito pa e aña akí. Den transkurso di e dianan promé ku 2 di yüli, Dia di Bandera, lo sigui publiká mas informashon di e nominadonan pa pueblo di Kòrsou sera konosí mas di aserka ku e personanan akí.

Tambe den kuadro di e Siman di bon Yu di Kòrsou kada un di personanan ku ta nominado pa e Krus di Mérito a risibí e boton di Bon Yu di Kòrsou serka Minister sra. Marilyn Alcalá-Wallé.

Ku esaki Gobièrnu di Kòrsou ta duna rekonosementu na nos mes hendenan pa nan aporte balioso na nos Pais.

KOMUNIKASHON

Ministerio konserní