Notisia

WILLEMSTAD – Riba 18 di yüni Minister di Enseñansa, Siensia, Kultura & Deporte sr. Sithree van Heydoorn a hasi e pregunta na 5 kandidato ku a keda presentá pa risibí un kondekorashon di Krus di Mérito, si nan ta aseptá di risibí e kondekorashon akí riba 2 di yüli próksimo.

Sektor di Kultura i Deporte a risibí mas ku 40 petishon e aña akí i Komishon Krus di Mérito tabata tin un trabou masha duru pa hasi un eskoho den e kandidatonan ku a hasi trabounan meritorio pa nos komunidat durante di e trayektora di nan bida. Despues di presentá e eskoho na Konseho di Minister, e komishon a risibí e aprobashon i ta anunsiá ku e 5 nominadonan pa risibí Krus di Mérito 2021 ta: sra. Grace Goede, sra. Maria Diwan, sr. Cesaio Lacroes, sr. Ludwig Muden i sr. Cedric (Ced Ride) Ridderplaat. Kada un di e personanan akí a hasi trabounan meritorio i di forma boluntario pa komunidat di Kòrsou den vários área. Bo por klik aki pa tuma nota di e CV di kada un di e nominadonan: Informashon Nominadonan KDM 2021

Ku hopi orguyo nos por bisa ku kada un a aseptá pa risibí e kondekorashon di Krus di Mérito pa e aña akí. Den transkurso di e dianan promé ku 2 di yüli, Dia di Bandera, lo sigui publiká mas informashon di e nominadonan pa pueblo di Kòrsou sera konosí mas di aserka ku e personanan akí. E krus ta keda otorgá na e nominadonan durante di e aktividatnan di Dia di Bandera. Ku esaki Gobièrnu di Kòrsou ta duna rekonosementu na nos mes hendenan pa nan aporte balioso na nos pais.

**riba e potrètnan athunto por tuma nota di e momentu kaminda e kandidatonan a aseptá pa risibí e krus di Mérito.