Publiká riba 28 Yüni 2018
Gobièrnu ke stimulá nos tur pa yuda otro kuida e sentido nashonalista i di patriotismo pa ku nos bandera ku ta un símbolo sagrado di nos Pais.
Nos ta den e siman di preparashon ku lo kulminá ku Dia di Bandera di Kòrsou. Bandera ta un instrumento pa identifiká un teritorio komo pais i òf parti di un pais. Bandera, huntu ku eskudo i himno ta forma símbolo di un pais. Punto di salida klave ta ku kada hende ku stima su pais ta honra su bandera i tambe bandera di otro pueblonan komo símbolo di mas haltu di un pais.
Na promé lugá Ministerio di Enseñansa, Siensia, Kultura & Deporte ta rekordá pueblo di Kòrsou riba algun regla stipulá i ku ta importante na e sentido nashonalista i patriótiko di kada bon siudadano i tambe ku e ordenansa A.B.1984 nr. 28, 32 i 35 ta aplikabel ainda den pais Kòrsou.
– Na momentu ku ta hisa bandera mester mustra rèspèt. Pone man banda di kurpa i no krusa esakinan;
– Hende hòmber (ku eksepshon di esnan uniformá) mester kita pèchi i tené den nan man robes banda di nan kurpa;
– No ta pèrmití pa usa bandera komo dekorashon;
– No ta pèrmití uso di bandera pa ningun meta promoshonal òf propaganda;
– Ta prohibí pa skibi òf pinta riba bandera;
– Si usa un bandera sushi òf kibrá ta símbolo di falta di rèspèt;
– Mester paga tinu pa ora ta hisa i baha bandera pa esaki no lastra abou;
– Hisa un bandera nashonal kabes abou ta negligensha grave i pa un pais estranhero esaki ta un ofensa grandi, a ménos ku esaki ta ser usá den un kaso di peliger grave;
– E bandera mester keda hisá na un manera ku e no ta mishi abou i ku e no ta stroba tráfiko (ounke ku e bandera ta hisá te na mitar);
– Mester baha e bandera promé ku bira skur (ora solo ta bai baha);
– E bandera por keda bula henter anochi, basta e ta bon iluminá;
– No ta permití pa pone dekorashon riba e bandera;
– Si mas bandera keda hisá, nan mester ta meskos na midí i riba mes un haltura hisa. Na momentu ku ta bai hisa dos bandera e lugá di honor ta na banda drechi konsiderando ku ta para ku lomba pa e bandera.
Medidanan disiplinario
1. Esun ku traha un bandera di Kòrsou i aktua kontra reglanan vigente relashoná ku komposishon, koló i tela di bandera i tambe esun ku, sin pèrmit di instansianan outorisá pa Gobièrnu, multipliká e bandera, ofres’é na benta, entreg’é, bend’é òf dun’é pòrnada, ta kastigabel ku máksimalmente un luna di prizòn òf un but di máksimalmente dos mil sinku shen florin (fl. 2.500,00).
2. Esun ku na Kòrsou intenshonalmente kibra, mancha òf baha prestigio di e bandera pa medio di aktonan insultante, lo haña un kastigu di máksimalmente dos luna di prizòn òf un but di máksimalmente sinku mil florin (fl. 5.000,00).
3. Esun ku, pa di dos biaha denter di un aña, kometé aktonan kontra di e reglanan akí, ta haña un kastigu dos bes mas pisá ku esnan ya menshoná.
Ministerio di Enseñansa, Siensia, Kultura & Deporte ta enfatisá ku nos Bandera ta sagrado i ku nos tin ku trata esaki ku rèspèt.
Gobièrnu ta stimulá nos tur pa yuda otro kuida e sentido nashonalista i di patriotismo pa ku nos bandera ku ta un símbolo sagrado di nos Pais.
