Nos korona di Triunfo, Logro i Perseveransia ta un realidat - Informashon tokante Gobièrnu di Kòrsou Bo opinion

Notisia

Nos korona di Triunfo, Logro i Perseveransia ta un realidat

Geplaatst op 06 July 2018 dor di Ministerio Enseñansa, Siensia, Kultura & Deporte

 

1 di yüli 2018 último a kumpli 155 aña di Abolishon di Sklabitut i alabes nos a konmemorá e dia komo dia di Emansipashon. Riba e fecha históriko aki Gobièrnu di Kòrsou a desvelá e korona di TRIUNFO, LOGRO I PERSEVERANSIA rondó di e palu di bandera na Brionplein. E korona ta para pa “Historia den Moveshon”. E símbolonan den korona ta demonstrá aspektonan kultural, históriko i fraternal di nos pais. Nos pasado ta vislumbrá nos presente i proyektá nos futuro.

E korona aki ta un inisiativa di Minister di Enseñansa, Siensia, Kultura i Deporte, sra. Marilyn Alcalá-Wallé c.q Gabinete Rhuggenaath i a keda ehersé bou di su enkargo. Meta di e korona aki ta pa konhuntamente nos protehá, kuida i respetá nos bandera. Alabes pa nos simbolisá nos historia den movishon. 

Minister Marilyn Alcalá-Walle i e komishon ku a hasi tur esaki posibel, ta sumamente orguyoso di por presentá e logro aki na pueblo di Kòrsou.

Gobièrnu ta gradisí un i tur ku a hasi nan máksimo esfuerso pa e korona aki bira un realidat: Sra. Herta Parabirsing-Balentina (kordinadó di proyekto), Sr. Dito Abbad(arkitekto), Sr. Giovanni Abath (artista), Sra. Lizette Sambo-Velder (direktor di Uitvoeringsorganisatie Cultuur en Sport) i su tim.

Komishon di konseho:Sr. Fransisco Paulina (Shon Pau), Sra. Jessica Damon, Sr. Elmer Marti, Sr. Sergio (Gino) Everon, Sr. Mungo Blanken, Sra. Marushka Manuel (Plataforma di Otrobanda), Sr. Charles do Rego, sr. Valdemar Marcha, Plataforma Sklabitut i Herensia di Sklabitut ku a duna kontenido na e 10 símbolonan den e korona.

Ban kuida nos korona huntu. Un gradisimentu speshal na henter pueblo di Kòrsou ku a asistí masalmente na e selebrashonnan di Dia 1 & 2 di yüli. Danki pa biba nos kultura, história i presente den union.

Ministerio konserní