Publiká riba 15 Òktober 2018
” Nos Medioambiente i Naturalesa,
Ban Kambia Nos Aktitut Pa Kuid’é.
Willemstad– Di 15 pa 20 di Sèptèmber 2018 ta siman di medioambiente i naturalesa. Minister di Salú, Medioambiente i Naturalesa ke pa nos kuminsá kuida Kòrsou mas konsiente. P’esei durante e siman di medioambiente i naturalesa nos ta hiba e lema: “Mester limpia Korsou”. Nos aktonan diario tin hopi influensha riba nos Medioambiente i Naturalesa.
Durante e siman aki lo publiká riba media nan sosial videonan ku lo lagabo haña mas informashon tokante medioambiente i naturalesa. Asina nos por haña un mihó bista kiko ta e kosnan ku nos mester hasi.
Medioambiente i Naturalesa tin di haber ku nos alrededor, e totalidat di nos atmósfera (aire), suela i awa ku tin influensha riba tur organismo bibu kual ta hende, mata i bestia.
Ta importante pa haña mas komprondementu riba faktornan ekológiko, ekonómiko, sosial, polítiko i kultural pa por determiná e balanse entre hende i naturalesa i asina desaroyá strategianan. P’esei ta importante pa wak kon nos ta anda ku nos naturalesa. Aki ta hopi esensial e desishonnan i aktonan ku no por drai bek mas. Nos mester tin konosementu di e aspektonan di medioambiente, e sistemanan i prosesonan pa por aktua na lugá. Tambe mester tene kuenta ku e funshon di naturalesa pa e hende. Esaki prinsipalmente ta pa konsumo di nos kuminda, pero tambe mester wak e relevansha pa e salu físiko i mental. Anto tambe naturalesa ta bunita pe hende i por kontribuí na inovashon.
Ta importante pa nos tur bira mas konsiente kiko nos medioambiente i naturalesa ta nifiká pa nos di manera ku nos por hasi bon uso di dje mientrastantu nos ta trat’é di tal forma ku e ta keda bon konserva pa esnan ku lo hasi uso di e mundu aki despues di nos.
Na Korsou nos ta tene hopi akshon di limpiesa, kual ta bon, pero na mes momento esei ta mustra ku nos no ta konsiente kon nos ta anda ku nos medioambiente. Positivo ta ora nos akshonnan enkontra ménos sushi riba i kantu di kaminda, den laman i den nos mondinan. Ora nos mira ku nos outonan ta saka ménos huma pretu i den futuro nos refineria por kumpli ku normanan moderno. E ora ei nos por bisa ku nos a kuminsá kuida nos medioambiente i naturalesa.
Kada un di nos ku por alkansá aportá su granito na nos medioambiente i naturalesa ta duna un sosten grandi na un Korsou duradero. Komo Minister di Salú, Medioambiente i Naturalesa mi ta deseá tur hende un siman konsiente di nos medioambiente i naturalesa. Kòrda bishita nos page suzycameliaromer@facebook.com. 