Notisia

Gobièrnu huntu ku representantenan di Famia Gerardina i Gutierrez a tene un seremonia di desvelo di e obra di Arte na Berg Altena “50 aña 30 mei 1969”. Ku instalashon di e monumento aki Gobièrnu di Kòrsou ta pone un dimenshon inklusivo na e konmemorashon di 30 di mei 1969 kaminda ta honra e dos víktimanan Orlando Gerardina i Manuel Gutierrez i tambe konmemorá Willemstad ku a sufri dañonan kuantioso. Minister Presidènt Eugene Rhuggenaath a hiba palabra akompañá pa  famianan Gerardina i Gutierrez i a duna un deskripshon di e obra na presentenan.  Desvelo di e obra tabata na enkargo di Minister Presidènt Eugene Rhuggenaath, Minister di Enseñansa, Siensia, Kultura & Deporte sra. Marilyn Alcalá-Wallé i sr. Yubi Kirindongo. Na final un representante di kada famia a hiba palabra i a gradisí Gobièrnu di Kòrsou pa a instalá e monumento “30 mei 1969” na memoria di nan ser kerí.

Deskripshon Obra di Yubi Kiringdongo:

“50 Aña 30 Mei” (2019), trahá pa artista visual Yubi Kirindongo. E kompas òf Rosa di Bientu na haltu ta nifiká e hende ku a bini di diferente direkshon pa yuda konstruí nos nashon. Tambe e ta nifiká ku nunka nos sa eksaktamente di kua direkshon bientu ta bini òf kiko destino ta trese kuné.

E dos partinan (‘schakel’) di kadena ku ta kologá na e kompas òf Rosa di Bientu ta simbolisá e dos víktimanan mortal di e suseso na Parera; sr. Orlando Gerardina i sr. Manuel Gutierrez. E parti ariba ta balansá riba un staka fini, pa indiká vulnerabilidat di bida i ku pa emotibu di e vulnerabilidat aki mester tene duru na balornan klave den bida manera kolaborashon, diálogo konstruktivo i union pa nos pais por bai dilanti.

E piedranan ta simbolisá ku nos kada unu ku ta biba riba e pida baranka ku yama Kòrsou por ta diferente pero ku union ta hasi forsa pa saka nos pais dilanti.

E pilá di blòki riba kua e obra ta haña sosten, ta simbolisá Willemstad, ku tabata i ta e sentro di siudat importante di entrada, historia, negoshi, bida, i kupo di trabou di Kòrsou, ku alabes a keda edifiká pa hende di diferente orígen ku a yega Kòrsou for di diferente direkshon.

**Un danki di kurason na sr. Ernesto (Tico) Vos pa a sa di kapta e momentu históriko.

**************************************************************

MAS NOTISIA

Ministerio konserní: Enseñansa, Siensia, Kultura & Deporte