Publiká riba 04 Sèptèmber 2017
Obra Públiko, komo organisashon di Ministerio di Tráfiko, Transporte i Planifikashon Urbano, a kontrolá situashon di shelternan na Kòrsou i a konstatá ku tur ta den bon estado pa por fungi si tin mester. Obra Públiko, ku ta responsabel pa e parti di infrastruktura den e struktura di kalamidat i krisis na Kòrsou, a kuminsá tuma medida i hasi preparashon for di siman pasa, ora Servisio Meteorológiko a menshoná ku ta tin un disturbio na kaminda.
Mientrastantu Obra Públiko tambe a kuminsá limpia sushi for di duikernan pa evitá ku esei por opstakulisá awa pasa. Esaki mester yuda pa awa por pasa mas liber posibel i no kousa inundashon inesesario. Ta pidi hende tambe pa kontrolá nan mes besindario riba sushi gròf ku por kousa inundashon. Manera konosí, no ta yerba den roi ta okashoná molèster, pero mas bien opstakulonan ku ta blokia e bokanan den nos sistema di riol. Obra Públiko ta urgi tur hende pa sigui e desaroyonan di tormenta tropikal Bret di aserka, pa asina ta bon na altura i no drenta pániko inesesario.
