Publiká riba 29 Sèptèmber 2026
Willemstad- Djaluna 28 di sèptèmber 2026, durante di un seremonia 8 personal di Sentro di Detenshon i Korekshon Kòrsou (SDKK), a risibí nan Sertifikadó di ‘Scanner Image Interpretation’ serka Smart Security Consultancy &Training. Smart Security Consultancy &Training ta un kompania spesialisá pa duna training riba diferente area di seguridat.
Den kuadro di esaki e 8 personal di seguridat di prizòn a sigui e kurso ariba menshoná ku tabata tin e parti teoretikó i praktikó. E ophetivo di e kurso aki ta pa duna e personal di SDKK, e konosementu kon pa alsa nivel i servisio di seguridat na momentu ku tin ku hasi uso di X-ray mashin durante kòntròl na porta di e instituto.
Na e okashon di entrega di sertifikadó a hiba palabra direktor suplente sr.Anthony Hasselmeijer, sr.Gilbert Cijntje di ICUC, instruktornan di Smart Security Consultancy &Training sr.Rudwin Mogen i sr.Eulogio Martina i tambe e kursistanan ku a duna un resúmen kòrtiku di nan eksperensia di e trayekto di e kurso ku a keda duna durante 2 siman ku a pasa.
Finalmente Gerensia di SDKK ta sumamente satisfecho ku e logro aki i lo sigui inverti den nos personal, pa asina garantisá e servisio i seguridat na prizòn.
