Publiká riba 25 Novèmber 2022
WILLEMSTAD – Resientemente Inspektor di haf (Haveninspectie) i empleadonan di Direktorado di Kontrol di Riesgo i Maneho pa Kalamidat (DRR) a partisipá na un “Operational training oil spill control” na Statia. E kurso tabata organisá dor di Ministerie van Infrastructuur en Waterstaat konhuntamente ku Gobièrnu di Statia.
Ophetivonan di e kurso tabata pa entrená ku e ekiponan ku ta usa pa por kontene un derame di zeta riba awa prome ku jega tera of partinan sensitivo na kosta (parti operashonal) i e aspektonan táktiko i tomo di desishon.
Derame di zeta ta identifiká den e Profil di Riesgo di Korsou 2017-2022 komo un riesgo ku un probabilidat haltu i ku konsekuensia konsiderabel pa Korsou. Basa riba e Profil di Riesgo di Kòrsou, Gobièrnu di Kòrsou ta dedikando atenshon mas spesífiko na prevenshon i preparashon pa e riesgonan identifiká. Ku e meta pa logra limitá dañonan personal, material i medio ambiente promé, durante i despues di kualkier krísis òf kalamidat ku por sosodé na Kòrsou.
Kòrsou konhuntamente ku e diferente “stakeholders” lokal a traha durante último añanan riba un plan di emergensia pa derame di zeta (National Oil Spill Contigency Plan Curaçao). Den e plan aki e responsabilidat di tur partido ta identifiká. Na sèptèmber último a hasi un ehersisio “table top” usando e plan. Otro aña lo bai tin un ehersisio “full scale”, kaminda lo bai entrena hasiendo uso di e konosementu atkerí na e training na Statia i diferente ekiponan lokal.
Riba e siguiente pòtrètnan por mira sr. Bennett, kordinadó di krisis di Statia, sra. Lobo-Pieters di DRR, sr. Eversdijk, mènedjer di krisis Rijkswaterstaat i sr. Sprott, inspektor di haf na Haveninspectie.
