Notisia

Willemstad – Riba djaluna 19 febrüari, alrededor 3or di atardi, Projectteam Toezicht en Handhaving (PTH) di Ministerio VVRP, a hasi inspekshon di vários tereno den área di Duzu, pegá ku Tera Cora.

Na yegada di PTH, a enkontrá sierto persona trahando riba un konstrukshon i un trùk di pòmp bashando semènt pa terminá e dak di betòn. Na momentu ku PTH a hasi su investigashon, a resultá ku no tin pèrmit di konstrukshon ni e tereno no tabata otorgá na e persona.

PTH a para tur trabou i a ordená e trùk di pòmp pa stòp di basha betòn i bandoná e tereno.

PTH a deskubrí un kantidat di 10 konstrukshon ilegal mas den e área, i a pone bòrchinan di atvertensia indikando ku mester stòp inmediatamente ku e konstrukshon ilegal na tur e konstrukshonnan detektá. Lo sigui ku mas investigashon. Tambe a kue vários hèrmènt i material ku tabata na e diferente sitionan den ‘bewaring’.

E persona na e sitio a risibí un but di fl. 2500. Esaki ta segun artíkulo 9 inisio 4 di Kòrsou su Eilandelijke Ontwikkelingsplan Curaçao (EOP) mirando ku e tereno indiká ta área konservá (‘conserveringsgebied’).