Publiká riba 31 Yüli 2019
WILLEMSTAD – Gobièrnu di Kòrsou a tuma nota di e echo ku na e momentunan akí riba ret sosial tin informashon ta sirkulando ku aparentemente Konseho di Minister di Reino (Rijksministerraad) lo a tuma un desishon rondó di e proyekto HNO. E situashon akí a surgi despues ku a bira konosí ku pa risibí konseho a presentá un Dekreto Nashonal relashoná ku e Akuerdo di liñanan grandi (Hoofdlijnenakkoord) na Konseho di Estado di Reino (Raad van State). Entrega di esaki a tuma lugá den forma di un konsepto Dekreto Real (Koninklijk Besluit).
E konsepto Dekreto Real ku a publiká riba ret sosial sinembargo ta enserá un argumentashon di Gobernador ku Konseho di Minister di Reino a presentá na Konseho di Estado di Reino pa haña konseho riba dje. Ya ku ta trata akí di un konsepto esei ta impliká ku ofisialmente Konseho di Minister di Reino no a tuma ningun desishon ainda. Esaki ta debí ku no a risibí konseho ainda di Konseho di Estado di Reino, ounke e prosedura a start entretantu.
Gobièrnu di Kòrsou ta deseá di trese e mensahe akí di forma kla na komunidat di Kòrsou, entre otro dor di para ketu na artíkulo 21 di e Reglamentu di Gobernador. Esta, e artíkulo ta determiná ku Gobernador ta keda sin stipulá un Lei òf Dekreto Nashonal presentá na dje na momentu ku e ta di opinion ku esaki ta bai kontra di Statüt, un reglamentu internashonal, Lei di Reino òf medida general di alto supervishon. Esaki tambe ta konta pa interesnan ku ta kai bou di asuntunan di Reino.
Na momentu ku Gobernador disidí di keda sin stipulá e dokumentu ku a entregá, lo e pone Rei komo persona na kabes di Gobièrnu di Reino direktamente na altura di esaki. E prosedura ku despues ta sigui ta enserá ku Konseho di Minister di Reino ta bai duna oido na Konseho di Estado di Reino, promé ku tuma un desishon. Despues di a konsultá ku Konseho di Estado di Reino, lo determiná pa medio di un Dekreto di Reino, si Gobernador na su turno por stipulá e Dekreto Nashonal ainda ya ku esaki no tabata kontra di e interesnan ariba menshoná. Si akaso disidí ku e dekreto tòg ta kontra, lo anunsiá esaki den e korant di publikashon ofisial.
Gobièrnu di Kòrsou ta spera ku di e forma akí, esta atraves di informashon korekto, por neutralisá e diferente notifikashon i opinionnan ku tin riba ret sosial. Mientrastantu Gobièrnu ta keda en espera i wak kon e prosedura ta sigui kana konfiando riba un bon resultado na final.
