Publiká riba 30 Òktober 2023
Pa medio di diferente trayektonan manera entre otro di deporte lo traha pa prevení hóbennan di kai den man di hustisia
WILLEMSTAD – Minister di Enseñansa, Siensia, Kultura i Deporte sr. Sithree van Heydoorn den kolaborashon ku Minister di Hustisia sr. Shalton Hato a firma un protokòl kaminda e ministerionan ta komprometé pa traha di forma mas estrecho riba tereno di prevenshon i resosialisashon. Ku e meta pa kombatí kriminalidat partikularmente bou di hóbennan. Esaki ta un kombenio amplio bou di kual vários proyekto lo restorá. Na mes momento e promé proyekto a keda firmá entre Sentro di Detenshon i Korekshon Kòrsou (SDKK) i Servisio di Skolnan Públiko (DOS).
E proyekto aki ta na enkargo di OSBOD “Openbare Secundair Beroeps Onderwijs Deeltijdopleidingen”. Ta trata aki di e proyekto asina yamá “Learning inside out”, kaminda ta siña paden durante e periodo di enkarselashon pa ta mihó prepará ora sali pa subi merkado laboral òf sigui studia. E proyekto aki ta keda finansiá for di fondonan di kriminalidat. Na momentu ku un kliente di SDKK ta sinta un kastigu penal gobièrnu tin e obligashon pa trata mas tantu posibel pa reformá e persona i asina krea perspektiva pa na momentu ku e persona bandoná e sentro penitensiario e no mester bolbe kai den e mesun situashon ku e tabata aden.
Gabinete Pisas II por medio di e protokòl entre ministerionan di ESKD i Hustisia lo sigui traha di forma konhunto riba resosialisashon di e klientenan di SDKK. Huntu lo bai traha di forma riba prevenshon i kombatimentu di kriminalidat pa medio di entre otro deporte.
Den e akuerdo di gobernashon, Gabinete Pisas II a komprometé su mes pa bini ku trayektonan pa brinda un di dos oportunidat na esnan ku faya ku hustisia. Pues un gabinete responsabel ta kumpliendo ku lokual nan e la komprometé su mes na dje. Ku firmamentu di e dos protokòlnan, Minister ESKD sr. Sithree van Heydoorn i Minister di Hustisia sr. Shalten Hato ta duna kontenido na e palabrashon aki.
Gabinete Pisas II no tin duda ku un bon edukashon i formashon sigur ta e yabi pa éksito. Esnan ku pa un òf otro motibu a kai den brasa di hustisia mester sali for di SDKK mihó prepará, p’asina nan por tin mas oportunidat pa integrá bèk den komunidat.
Pa mas potrèt por bishitá: Akuerdo entre Ministerionan di Hustisia i ESKD.
