Oranjekleuterschool ta keda kombertí den un skol Speshal (ULC)
Publiká riba 08 Ougùstùs 2019
Resientemente un grupo di mayor a hasi un petishon na gobièrnu pa brinda un skol apropiá pa nan yunan na un skol speshal. Ta trata aki di e petishon di mayornan di Unique Learning Centre (ULC). Entretantu a haña un solushon temporal pa e muchanan di ULC pa aña eskolar 2019/2020, konforme e raportage tokante di kada un su situashon spesífiko.
Minister di Enseñansa, Siensia, Kultura & Deporte sra. Marilyn Alcalá-Wallé a ekstendé un invitashon na mayornan di ULC pa un reunion di informashon. Mayornan a hasi un petishon pa posponé e reunion ku un siman.
Banda di e trayekto temporal aki, gobièrnu ta trahando riba un trayekto struktural i duradero pa akapará e alumnonan ku ta kai bou di e asina yamá cluster 4 di skol speshal. Konforme artikulo 21 di Areglo di Estado di Kòrsou gobièrnu mester tin un kantidat sufisiente di skolnan públiko disponibel pa formashon general básiko. Ministerio di Enseñansa, Siensia, Kultura i Deporte ta trahando riba un PvA, un plan di ehekushon, pa realisá e proyekto aki mas lihé posibel. Asina ta finalisando aktualmente:
- E lei nobo pa Enseñansa speshal. Den esaki cluster 4 tambe ta inkorporá;
- E lokalidat di e cluster 4 skol ta konosí i ta situá den e edifisio antes Oranjekleuterschool/ Rebound na Oranjestraat, ku ta den bon kondishon;
- Preparashon di Kuríkulo;
- Ta trahando riba e kuerpo di maestro i e speshalismonan nesesario;
- Ta trahando riba leerplan/plan di edukason i material nesesario;
- Inventario i mas.
Pa klaridat ta importante pa indiká ku banda di skol regular, tin skol speshal ku ta keda repartí den e asina yamá clusters:
- Cluster 1. skolnan pa muchanan ku bista limitá o sin bista;
- Cluster 2. skolnan pa muchanan ku retonan o difikultat ku oidi, abla o lenga;
- Cluster 3: skol pa muchanan ku hopi difikultat pa siña (zmlk), muchanan ku diferente limitashon o ku tin malesa króniko;
- Cluster 4: skol pa muchanan ku petishon pa sosten den kuadro di retonan di komportashon o retonan mental, psikológiko o psikiatriko.
Riba e foto nan athunto por tuma nota di bishita di Minister di Enseñansa, Siensia, Kultura & Deporte sra. M. Alcalá-Wallé den kompania di Direktor di Sektor di Enseñansa i Siensia sr. W. Kleinmoedig na e edifisio di Oranjekleuterschool (Rebound).
*************************************************