Publiká riba 05 Sèptèmber 2022
WILLEMSTAD – Dia di Outonomia (10 di òktober), Gobièrnu di Kòrsou ta habri e posibilidat pa organisá aktividatnan di marshe rònt Kòrsou manera usualmente ta e kaso riba Dia di Rei. Persona i organisashonnan ku ta interesá pa organisá un evento di marshe den kuadro di Dia di Outonomia, mester hasi petishon pa un pèrmit di evento (Evenementenvergunning) pa por hasi esaki. E petishon pa un pèrmit di evento mester keda entregá pa mas tardá djaluna,12 di sèptèmber próksimo pa e pèrmit por keda kla na tempu.
Tur persona ku ta interesá pa para bende kos durante kualke un di e eventonan akí, mester aserká e organisadó direktamente ku ta na enkargo di e evento den e bario òf área kaminda e persona ta deseá di bende kos. E organisadó e ora ei, ta hasi un petishon kolektivo pa pèrmit di standplaats i vent di tur e partisipantenan ku lo bende produkto sea via un stènt òf di forma ambulante den su bario òf área. Petishonnan kolektivo pa pèrmit di standplaats i vent mester keda entregá pa mas tardá djaluna, 19 di sèptèmber próksimo. Tur petishon pa pèrmit den kuadro di aktividatnan di marshe riba Dia di Outonomia, mester sosodé serka Lokèt di Pèrmit situá na Saliña 127 (pegá ku Subway). Por yama tambe na number di telefòn 433-3123 òf mail na intake.vergunningenloket@gobiernu.cw. Serka Lokèt di Pèrmit por haña tambe informashon amplio tokante dokumentonan nesesario, tarifanan i informashon general tokante e pèrmitnan nesesario pa eventonan riba Dia di Outonomia.
Tene kuenta ku tantu e pèrmit di evento komo e pèrmitnan di vent i standplaats den e kaso akí, ta di karakter temporal i ta konta solamente pa e eventonan ku ta tuma lugá riba Dia di Outonomia 2022. Por sosodé ku e organisadó na su turno, por kobra e partisipante un kontribushon chikitu pa yuda kubri entre otro gastunan di stènt i promoshon di e evento durante Dia di Outonomia.
Algun luna pasá Ministerio di Desaroyo Ekonómiko (MEO) a hasi un petishon na Konseho di Minister pa bai di akuerdo ku organisashon di evento- i aktividatnan manera esaki por lo pronto riba Dia di Outonomia i Dia di Bandera, aparte di esnan ku ya nos a kustumbrá kuné riba Dia di Rei tur aña. Pa MEO, e tipo di aktividatnan akí ta sumamente importante den kuadro di enrikesimentu di nos sektor kreativo. Aki na Kòrsou nos tin hopi hende sumamente kreativo ku diariamente ta ‘lora man’ pa sali padilanti i aktividatnan manera esaki ta krea e posibilidat pa e personanan akí por sali i eksponé e produkto òf servisio ku nan tin di ofresé na un grupo mas grandi den komunidat.
