WILLEMSTAD – Djamars, 5 di mei 2026, a tuma lugá na ORV un seremonia di entrega di sertifikado na 24 Praktijkbegeleiders Penitentiare Inrichtingswerkers (PB PIW) i 5 Praktijkbegeleiders Opleiding Grensbewaking (PB OGB).
Den nan formashon komo “praktijkbegeleiders” klas 1 ku 2 di PB PIW-2026 i klas 1 di PB OGB-2025 a siña kon pa guia, stimulá i evaluá nan koleganan nobo den nan proseso di desaroyo profeshonal. Durante e kurso, nan a trata temanan importante manera abilidatnan di komunikashon, entrenamentu i guia, i aktitut profeshonal, ku a ekipá nan ku e konosementu i abilidatnan esensial pa sirbi komo mèntòr.
Durante e seremonia, e graduadonan a risibí nan sertifikado despues di a kompletá nan formashon ku éksito, den presensia di Direktora di ORV, Sra. Alpha Falbru, i Sektor mènedjer pa estudionan postinisial, Sr. Jowenny Troeman.
Nan logro no solamente ta representá un meta personal, sino tambe un kontribushon balioso na fortalesementu di responsabilidat, integridat i profeshonalismo den e sektor di lei i seguridat na Kòrsou.
ORV ta orguyoso di e resultado akí i tin konfiansa ku e graduadonan lo sigui inspirá i guia futuro generashon di profeshonalnan.
