Publiká riba 10 Yüli 2018
Willemstad – Outoridat Marítimo di Kòrsou (MAC), ku ta parti di Ministerio di Tráfiko, Transporte i Planifikashon Urbano, ta anunsiá ku resientemente a drecha e faro na Ostpùnt.
E faro na Ostpùnt tabata for di funshon. Mester a realoká fondonan riba presupuesto 2018 pa por a hasi e trabounan pa bolbe tres’é bèk den funshon Awor ku el a wòrdu drecha, tur lus di tur faro ta sende. Na Kòrsou tin 2 faro: unu na Ostpùnt i unu na Westpunt, i na Klein Kòrsou tin 1 faro.
E faro ta di vital importansia pa esnan ku ta nabegá den nos awanan teritorial. Un faro ta un toren ku ta wòrdu traha den besindario di kosta, barankanan na kosta, òf direktamente riba e barankanan serka di kosta, i kanalnan. Nan meta ta pa den oranan di anochi i na momentu ku tin mal tempu, avisá barkunan ku tin baranka òf ku nan ta yegando un entrada. Mayoria barku ta hasi uso di sistemanan moderno i elektróniko, entre otro sistema di GPS pa sa nan lokashon i nabegá, i tambe ta usa e sistema di faro. Faro ta un eksigensia internashonal ku paisnan mester buta pa alerta tur ku ta nabegá.
Awor ku e trabou pa drecha e faro na Ostpùnt a tèrmina, MAC lo perkurá pa e mantenshon regular di e lusnan di e faro. Tin un kontrakt pa mantenshon di lus te ku fin di aña aki. Despues MAC ta bai traha riba kontrakt nobo pa futuro. Esaki lo sosodé den koperashon ku Domeinbeheer, ku ta e organisashon ku ta enkargá ku mantenshon general di edifisionan di gobièrnu.
MAC ta gradisí doñonan di e tereno na Ostpùnt ku semper a duna bon koperashon na momentu ku mester drecha i mantené e faro.
