Publiká riba 05 Febrüari 2025
Willemstad – Servisio di Obra Públiko (OW) ta konsiente di e oumento di keho ku obstrukshon den sistema di riolering, i ta traha riba un solushon struktural pa por manehá e kehonan aki mas lihe. Pa motibu di falta di kontratista disponibel i ekipo sufisiente, e solushon di obstrukshon ta atrasa. OW ta trahando duru pa kontratá mas kontratista pa por resolvé e situashon aki mas lihé posibel.
Na Kòrsou tin un sistema di riolering ku ta transportá awa residual di kasnan via sistema di pòmp te na planta di purifikashon di awa na Kleinhofje i Klein Kwartier. Mayoria bario ku ta pertenesé na gobièrnu ta konektá na e sistema aki. Hopi kas partikular tin un berput. OW ta responsabel pa maneha keho relashoná ku obstrukshon den e sistema públiko di riolering.
Motibu di e retraso:
Den sierto kaso, keho di obstrukshon por ta resolvé den un dia, pero aktuamente e proseso ta dura mas largu pa motibu di falta di kontratista. Aktualmente, tin solamente un kontratista ku un trùk ta trahando pa destapá tuberia di riolering. Esaki ta kousa un atraso den e prosedura di resolushon di keho. OW ta traha riba kontratá mas kontratista pa mehorá e servisio i redusí e tempu di espera.
Ademas, sierto bario manera Emmastad, Julianadorp i Schelpwijk tin un sistema di riolering hopi bieu. Esaki ta eksigi trabou i invershon adishonal pa por logra un solushon duradero riba largu plaso.
Yamada na komunidat:
OW ta hasi un yamada na komunidat pa tene mas kuenta ku e sistema di riolering. Esensialmente, ta pidi pa no tira wipes den toilet. Kontrali for di papel di wc, wipes no ta disolvé den awa, ku ta kousa obstrukshon i ta stroba e mantenenshon di e sistema.
OW ta sigui traha riba un solushon efisiente i efektivo pa e situashon aktual i ta pidi kompreshon i kolaborashon di e komunidat den e periodo aki.
