Notisia

WILLEMSTAD- Ministerio di Desaroyo Ekonómiko (MEO) ta hasi un yamada na tur kompania/persona ku lo ke bende Kèrstbom i vürwèrk fin di aña awor, pa entrega nan petishon di standplaats temporal pa por hasi esaki di forma legal i sigur.

 Pa benta di palu di Pasku(kèrstbom) kantu di kaminda públiko ta rekerí pa e persona/establesimentu tin un pèrmit temporal di standplaats pa hasi esaki. Pa benta di vürwèrk ta rekerí, aparte di e pèrmit temporal di standplaats aki, tambe entre otro pa brantwer kùr e sitio i establesimentu. Pa por sigurá ku kosnan ta kana segun lei i reglanan vigente i tambe pa siguridat di tantu e bendedó(nan) komo klientenan di e lugá ta nesesario pa esnan interesá hasi petishon na tempu pa por optené e pèrmitnan nesesario.

Pa por hasi petishon pa un pèrmit di standplaats temporal pa benta di kèrstbom e petishonario mester trese e siguiente dokumentonan:

• Formulario di petishon yená;
• Karta di apoderashon (machtigingsbrief) i identifikashon di e apoderado(si akaso no ta e direktor/doño mes ta hasi petishon pa e pèrmit);
• Identifikashon bálido di e direktor/doño i su asistente(nan);
• Kopia di pèrmit di estadia (si akaso e direktor/doño òf su asistente(nan) ta estranhero);
• Komprobante di pago pa e pèrmit;
• Seguro kontra daño na tersera parti;
• Karta di outorisashon di doño di tereno (den kaso di tereno privá);
• Komprobante di pago di prekario (si ta trata di tereno di gobièrnu);
• Stampia na balor di Fls. 20,- na momentu ku mester buska e pèrmit.

Pa por hasi petishon pa un pèrmit di standplaats temporal pa benta di vürwèrk mester trese tur e dokumentonan anteriormente menshoná i tambe e pèrmit di “Voorhanden hebben” (optenibel na DOW).

Tur persona ku tin e intenshon pa bende kèrstbom òf vürwèrk fin di aña aki lo mester hasi petishon pa nan pèrmit di standplaats temporal pa mas tardá djárason 11 di desèmber próksimo na Lokèt di Pèrmit situá na Saliña 127 (pegá ku Subway). Pa mas informashon un i tur por tuma kontakto libremente ku Lokèt di Pèrmit, Bentana di Informashon na tel. 0800-1515 òf 433-3123.

MAS NOTISIA

Ministerio konserní: Desaroyo Ekonómiko