Pa bende kerstboom i vuurwerk MESTER di un pèrmit di ‘standplaats’ temporal - Informashon tokante Gobièrnu di Kòrsou Bo opinion

Notisia

Pa bende kerstboom i vuurwerk MESTER di un pèrmit di ‘standplaats’ temporal

Geplaatst op 26 November 2020 dor di Ministerio Desaroyo Ekonómiko

WILLEMSTAD – Ministerio di Desaroyo Ekonómiko (MEO) ta hasi un yamada na tur kompania/persona ku lo ke bende kerstboom i vuurwerk durante periodo di fin di aña 2020, pa entregá nan petishon di ‘standplaats’ temporal na tempu pa por hasi esaki di forma legal i sigur. 

Pa benta di kerstboom kantu di kamindanan públiko, ta rekerí sin mas pa e persona/establesimentu tin un pèrmit temporal di ‘standplaats’. Pa benta di vuurwerk ta rekerí, aparte di e pèrmit temporal di ‘standplaats’ akí, tambe entre otro pa laga kùr e sitio i/òf establesimentu promé ku otorgá e pèrmit.

Pa por sigurá ku kosnan ta kana segun lei i reglanan vigente i tambe pa siguridat di tantu e bendedó(nan) komo klientenan di e lugá, ta nesesario pa esnan interesá hasi petishon na tempu pa por optené e pèrmit(nan) nesesario.

Tene kuenta, ku den kuadro di medidanan vigente di Covid-19, e sitio mester ta kumpli ku tur regla di higiena i distansia sosial. Si akaso e benta di kerstboom ta sosodé den un espasio será mester tene kuenta tambe ku e kantidat máksimo di persona ku por okupá e edifisio manteniendo sufisiente distansia i ta rekomendá uso di tapaboka. Aparte di esaki, ta konsehabel pa rutanan di kana na e sitio òf establesimentu ta mas tantu posibel den un (1) direkshon i ta pidi komersiantenan pa mantené un registrashon privá di e datonan di tur bishitante. Esaki ta fasilitá e proseso si akaso pa kualke motibu outoridatnan mester tuma kontakto ku e kliente.

Pa por hasi petishon pa e pèrmit di ‘standplaats’ temporal pa benta di kerstboom, e petishonario mester trese e siguiente dokumentonan:

  •  Formulario di petishon yená;
  •  Karta di apoderashon (machtigingsbrief) i identifikashon di e apoderado (si akaso no ta e direktor/doño mes ta hasi petishon pa e pèrmit);
  • Identifikashon bálido di e direktor/doño i su asistente(nan);
  • Kopia di pèrmit di estadia (si akaso e direktor/doño òf su asistente(nan) ta estranhero);
  • Komprobante di pago pa e pèrmit;
  • Seguro kontra daño na tersera;
  • Karta di outorisashon di doño di tereno (den kaso di tereno privá);
  • Stampia na balor di Fls. 20,- na momentu ku mester buska e pèrmit.

 Pa por hasi petishon pa un pèrmit di ‘standplaats’ temporal pa benta di vuurwerk, mester trese tur e dokumentonan anteriormente menshoná i tambe e pèrmit di “voorhanden hebben”  (optenibel na DOW).

Petishonnan pa e pèrmit di ‘standplaats’ temporal pa bende kerstboom mester keda hasí pa mas tardá djabièrnè 04 di desèmber próksimo na Lokèt di Pèrmit situá na Saliña 127 (pegá ku Subway). Pa benta di vuurwerk, e petishon pa pèrmit di ‘standplaats’ temporal mester ta entregá pa mas tardá djaluna 18 di desèmber.

Tene kuenta, ku Lokèt di Pèrmit ta enkurashá tur persona pa hasi uso mas tantu posibel di nan puntonan di kontakto digital. Por laga e petishon i tur dokumento rekerí na bali di Lokèt di Pèrmit òf por mail esakinan na intake.vergunningenloket@gobiernu.cw. Pa mas informashon tokante bo petishon pa pèrmit por yama departamentu di intake na e number temporal ku ta 434-1691. 

 

Ministerio konserní