Pa luna di mei 2021 tin un adaptashon den rekisitonan pa petishon di Sosten pa Empresario Individual. - Informashon tokante Gobièrnu di Kòrsou Bo opinion

Notisia

Pa luna di mei 2021 tin un adaptashon den rekisitonan pa petishon di Sosten pa Empresario Individual.

Geplaatst op 19 May 2021 dor di Ministerio Desaroyo Ekonómiko

Willemstad- Un di e sostennan ku Gobièrnu di Kòrsou a bin ta brinda na empresarionan, ta e sosten na empresarionan individual ku a hiba pèrdida finansiero komo konsekuensia di e pandemia di COVID-19; e asina yamá Sosten pa Empresario Individual (TBZO). Tur e diferente sostennan empresarial ku tin disponibel, ta keda implementá i manehá dor di Ministerio di Desaroyo Ekonómiko (MEO).

Pa e empresario individual ku mester hasi petishon pa sosten finansiero na luna di mei, ta bai implementá un kambio chikí den e rekisitonan ku mester entregá huntu ku e petishon.
Pa petishonnan anterior, tabata rekerí pa e empresario individual hasi un kalkulashon adelantá di kuantu e ta kere ku su gastunan fiho (vaste lasten) lo ta pa e luna den kual e ta entregá e petishon i tambe kuantu su entrada (omzet) pa e luna enkuestion lo ta.
MEO a tuma nota, ku tin bes por a resultá difisil pa e empresario individual hasi un kalkulashon adelantá di su gastunan fiho i e entrada ku e ta ferwagt, lokual tabata trese kuné ku entre otro e empresario tabata tarda un poko mas pa entregá su petishon.

Djaluna awor, 24 di mei pa 4’or di atardi e portal ta bolbe habri pa entre otro e Sosten pa Empresario Individual. Entrante e luna akí, enbes di entregá un kalkulashon di gastunan fiho i un kalkulashon di entrada di luna di mei, e empresarionan individual mester yena e montantenan berdadero di su gastunan fiho i su entrada di luna di aprel 2021; pues di e luna anterior.

Empresarionan individual ku ke hasi un petishon pa prome bia, por hasi esaki mandando tur datos i informashon di e empresa entrante djaluna 24 di mei pa 4’or di atardi via e-mail na empresario@fondosisosten.org. A base di esaki, MEO ta evaluá e petishon i ta informá e empresario via mail si e ta bini na remarke pa e sosten. Empresarionan Individual ku a yega di hasi petishon anterior i ya ta den sistema, ta risibí un mail ku link pa nan por hasi nan petishon pa luna di mei. Ta posibel entregá un petishon te ku djaluna 31 di mei pa 4’or di atardi i MEO ta hasi un apelashon na tur Empresario Individual pa entregá nan petishon únikamente denter di e periodo akí.

Pa kualke informashon adishonal tokante e Sosten pa Empresario Individual (TBZO), por tuma kontakto libremente via empresario@fondodisosten.org òf Whatsapp 561-2415.

Ministerio konserní