Publiká riba 01 Desèmber 2023
WILLEMSTAD – E hóbennan ku a partisipá na “Sociaal Vormings Traject (SVT)” “Un Komienso Nobo” na Kazèrne di Marina Suffisant a risibí nan barèt. E grupo di hóbennan aki, bou di guia di Defensa a kuminsá riba dia 21 di ougùstes 2023 ku e promé fase di e trayekto. Durante un periodo di kuater luna nan a siña den un forma militar norma i balornan tal komo disiplina, rèspèt propio, struktura, resistensia, konfiansa i sentido di responsabilidat.
Un grupo di 12 hóben riba djaweps 30 di Noveèmber 2023 por a risibí nan barèt ku nan a meresé huntu ku nan sertifikado durante un seremonia kòrtiku ku tur e partidonan envolví.
Siguiente Fase
E 12 hóbennan lo start mes ora ku e segundo fase, e trayekto di aprendisahe (Leerwerktraject (LWT), bou di guia di e organisashon ehekutivo Funditut. Durante e fase akí e hóbennan ta kontinuá ku nan preparashon pa un funshon ku ta pas pa nan riba e merkado laboral, di akuerdo ku nan kapasidatnan. Ku e dos fasenan aki Gobièrnu di Kòrsou huntu ku Defensa ta brinda perspektiva pa futuro na e hóbennan akí.
Realisashon di e Koperashon
E proyekto akí ta keda realisá den e kuadro di palabrashonnan entre Kòrsou i Hulanda, rondó di reformanan den e ‘Landspakket’. E reforma akí ta inkluí bou di e tema ‘H18’ i ta ser designá komo Programa di Formashon Sosial/‘Sociaal Vormings Traject’. Ministerio di Hustisia, Ministerio di Desaroyo Sosial, Labor i Bienestar (SOAW), Ministerio di Edukashon, Siensia, Kultura i Deporte (OWCS) i Ministerio di Defensa, tur ta partner den e proyekto akí.
Na febrüari 2024 ta bai kuminsá un SVT nobo di hóben hòmber. Bo ke meldu bo mes òf ta deseá mas informashon? Manda nos un WhatsApp na number: +5999 563-6626 ku bo datonan (number, fecha I lugá di nasementu, kopia di sedula I number di último skol). Tur hόben ku inskribí mester pasa un ‘assessment’ kual ta tuma lugá dia 9 I 10 di yanüari 2024.
