Publiká riba 04 Sèptèmber 2018
Willemstad – Minister Jesus-Leito huntu ku Domeinbeheer a tuma nota di diferente benta ilegal di tereno di Gobièrnu na preis di baka flaku. Domeinbeheer kier atvertí pueblo di Kòrsou pa paga hopi bon tinu i no kai den e trampa pa kumpra tereno di Gobièrnu, ku òf sin konstrukshon, ku no ta emití legalmente. Den ambos kaso lei ta kondená tantu e kumpradó komo e bendedó. Tin hopi kumpradó ku a resultá di ta víktima i e konsekuensianan ta grandi. Den un kaso asina, e kumpradó ta pèrdè su sèn i na Domeinbeheer e kaso lo ser konsiderá komo okupashon ilegal. Domeinbeheer no por duna un garantia ku por formalisá uzo di e tereno. Den e kuadro aki, Domeinbeheer ta atvertí pueblo di Kòrsou i duna algun punto importante ku kada kumpradó mester tene kuenta kun’é na momentu ku ta kumpra un kas òf tereno. Nòmber di personanan ku ta bende tereno di Gobièrnu ilegalmente ta konosí i Domeinbeheer ta tumando akshonnan legal kontra e personanan aki.
Posibel konsekuensianan
Tin diferente manera ku tereno di Gobièrnu ta ser bendí di forma ilegal. Ta bende tereno di Gobièrnu bashí, sin ningun konstrukshon ariba. Tambe sa bende tereno di Gobièrnu ku un konstrukshon riba dje, sin ku e tereno a ser emití legalmente dor di Domeinbeheer. Ademas, Gobièrnu no ta formalisá un tereno bashí den ningun kaso. Pues, aki tambe e kumpradó ta pèrdè su sèn. Den kaso ku e kumpradó a kumpra un tereno ku konstrukshon ilegal riba dje, e mester bai kana un proseso di formalisashon, den kual Domeinbeheer no por duna garantia ku e proseso lo tin un resultado positivo. Domeinbeheer ta splika tur petishonario di formalisashon ku ta evaluá kada kaso di okupashon ilegal individualmente. A base di resultadonan di evaluashon por determiná si por legalisá si òf nò. Si akaso no por formalisá, e kumpradó lo mester dil ku e konsekuensianan di esaki tambe.
Puntonan di atenshon pa e kumpradó
Ta importante pa kada persona ku ta deseá na kumpra un tereno òf kas evaluá tur aspekto di e tereno òf kas ku ta deseá na kumpra. Aki ta sigui algun punto ku mester tene kuenta kun’é na momentu ku ta kumpra kas/ konstrukshon riba tereno èrfpagt òf hür:
1. Domeinbeheer ta urgi kada persona ku kier kumpra un kas òf tereno, pa informá bon si e tereno ta emití legalmente, tantu serka e bendedó komo serka e instansia di Gobièrnu konserní (Kadaster).
2. Tene na kuenta ku e úniko tipo di tereno ku por bende ta tereno ‘eigendom’. No por bende tereno di Gobièrnu èrfpagt ni tereno di hür. Esaki no ta un akto legal.
3. Ora un kumpradó ta kumpra un kas riba tereno di Gobièrnu, e ta paga solamente pa e balor di e kas i no pa e tereno mes. E tereno ta keda tereno di Gobièrnu i mester paga anualmente pa e derechi di uzo, konforme e akuerdo di èrfpagt òf hür.
4. Ta importante pa kana e kaminda di kompra di kas òf tereno legalmente i evitá dolo di kabes despues. Na momentu ku bo ta kumpra un bien inmóbil (un kas òf un tereno ku kualke konstrukshon ariba) e kompra mester kana via notario pa bo risibí un akta notarial. Si bo no hasi’é via notario e traspaso ofisial no por tuma lugá.
Por mèldu benta ilegal
Si bo tuma nota òf ta na altura di benta ilegal di tereno di Gobièrnu, bo por mèldu via Facebook page Tereno pa Tur di Domeinbeheer òf bo por yama 0800-1919. Domeinbeheer ta habrí pa duna informashon adishonal kaminda esaki ta nesesario i posibel. Pa drenta den kontakto ku Domeinbeheer por akudí na Sentro di Servisio Domeinbeheer na WTC di djaluna pa djabièrnè, entre 8or di mainta pa 4or di atardi.
