Publiká riba 01 Òktober 2026
Dianan 17 i 18 di novèmber 2026, gobièrnunan di Aruba, Kòrsou, Hulanda i Sint Maarten lo bini huntu pa e promé “Kingdom Summit” na Sint Maarten. E kumbre yamá “Kingdom Summit” ta un konsulta atministrativo entre gobièrnunan di e paisnan outónomo di Reino.
E ‘Summit’ ta enfoká riba fortifikashon di e kolaborashon entre e kuater paisnan di Reino. Durante di e ‘Kingdom Summit’, kada pais lo tene su propio “State of the Nation,” na unda ku kada lider lo reflekshoná entre otro riba e éksitonan i retonan di nan pais. Tambe lo pone énfasis riba e áreanan di maneho na unda tin oportunidat pa kolaborashonnan nobo òf mas estrecho. Kolaborashon ta di importansia esensial pa un Reino kla pa futuro. Rèspèt mutuo pa otro su posishon, konekshon mutuo i e boluntat pa sostené otro ta pilánan importante di e kolaborashon ei.
E ‘Kingdom Summit’ akí ta ofresé oportunidat pa fortalesé i profundisá lasonan entre e gobièrnunan. Ademas e kuater paisnan ke logra mas kontinuidat i koheshon den e konsultanan periódiko entre e gobièrnunan. Segun Promé Minister di Sint Maarten, Dr. Luc Mercelina: “Sint Maarten ta spera di por yama e gobièrnunan di Aruba, Kòrsou i Hulanda bon biní na e promé ‘Kingdom Summit’ akí. “Pa medio di traha huntu mientras ku simultáneamente rekonosé nos diferensianan, nos ta konstruí un Reino mas fuerte i kla pa futuro.”
