Publiká riba 19 Òktober 2018
Willemstad- Resientemente Minister di Enseñansa, siensia, kultura i deporte sra. Marilyn Alcalá-Wallé a bishitá Gezaghebber di Bonaire sr. Edison Rijna i Diputado enkargá ku enseñansa sr. Edsel Cecilia den kuadro di e deseo pa traha huntu riba diferente tereno. Un di e aspektonan importante ta desaroyo di nos lenga materno Papiamento/u, kaminda anteriormente ya Gobièrnu di Kòrsou a yega na un akuerdo di koperashon ku Gobièrnu di Aruba. Tantu Gezaghebber Rijna komo Diputado Cecilia ta entusiasmá pa nos traha huntu riba e diferente terenonan.
Riba e imágen por tuma nota di gestonan ku a ser hasí despues di e enkuentro produktivo i eksitoso entre Korsou i Bonaire riba nivel gubernamental.
Pa lokual ta idioma, ta importante pa informá ku desaroyo di lenga/ idioma ta un area importante pa desaroyo general di un pueblo. Lenga ademas ta un medio di komunikashon importante pa un hende por hasi su mes komprendibel den su medioambiente i lenga ta un instrumento importante den desaroyo soshal di un komunidat. Konservashon di nos lenga ta sòru alabes pa konservashon di nos identidat komo pueblonan ku ta papia Papiamento/u.
Den e kuadro aki gobièrnu di Bonaire a palabrá ku e tambe ta apoyá e idea i inisiativa pa aserká UNESCO pa pone Papiamento/u riba e lista intangibel di herensia mundial. Di e forma aki tur tres isla ku tin Papiamento/u komo lenga materna, esta Aruba Bonaire i Kòrsou, ta traha huntu pa logra e meta komún.