Publiká riba 01 Mart 2023
Willemstad – Den área di Rif tin diferente kaminda ku tin palunan di mangel (‘mangrove’). Tin parti di esakinan ku ta riba tereno privá. Esaki Ministerio di Tráfiko, Transporte i Planifikashon Urbano (VVRP) ta splika.
Gobièrnu di Kòrsou ta propietario di e aktual Parke di Palu di Mangel (‘Mangrove Park’). Esaki ta ubiká enfrente di Megapir Tula. Carmabi ta enkargá ku e maneho diario di e parke aki, konformé e akuerdo ku gobièrnu.
Aktualmente, e kompania Corendon a risibi un pèrmit pa por limpia e parti di e palunan di mangel (‘mangrove’) ku ta riba nan tereno, esta tereno privá. Na parti ost di esaki, tin e Parke di Palu di Mangel aktual, i na parti wèst tin Corendon Hotel.
VVRP lo vigilá e trabounan di limpiesa pa garantisá ku ta salbaguardiá mas tantu palu di mangel posibel, i ku ta planta palunan di mangel nobo pa remplasá loke ku a kita. Esaki tur pa kuido di nos medio ambiente.
