Partisipashon di Kòrsou na Foro di UNESCO - Informashon tokante Gobièrnu di Kòrsou Bo opinion

Notisia

Partisipashon di Kòrsou na Foro di UNESCO

Geplaatst op 26 September 2021 dor di Ministerio Maneho di Gobernashon, Planifikashon i Servisio Públiko

WILLEMSTAD – Riba invitashon di UNESCO Minister Martina di Maneho di Gobernashon, Planifikashon i Servisio Públiko a partisipá na e di dos “Memory of the World Global Policy Forum” ku e tema “ Disaster Risk Reduction and Management for Sustainable preservation of Documentary Heritage”. E foro akí a tuma lugá na Paris, Francia.

Ta trata di un aktividat ku ta keda organisá anualmente, pero debí na e pandemia di COVID-19 e delaster biaha ku a tene e aktividat akí tabata na 2018. E ‘Policy Forum’ akí ta sumamente importante pa konservashon di dokumento (‘Documentary Heritage and Disaster Risk Reduction and Management’). Ta pa medio di dokumentashon nos konosé nos historia. Den e kuadro akí Minister Martina a haña e oportunidat pa splika kon nos di Kòrsou ta prepará pa esaki.

Un total di 700 hende rònt mundu a tuma parti na e foro, e.o. for di Saudi Arabia, China i Hapon.

Kòrsou ta hasi konservashon di dokumento na un manera ehemplar den mundu te ku awor akí. Durante di e foro reglanan ta keda presentá, diskutí i na final akordá. Di e forma akí ta sòru ku rònt mundu ta trata i warda dokumentonan di archivo di mes forma, ya ku mundialmente ta un reto pa preservá dokumentonan. Esaki e.o. dor ku tur kaminda na mundu tin kambionan den klima, nivel di laman i tambe temblornan ku ta sosodiendo. 

Pa e motibu akí mester trata na krea un ‘safe resident environment’ (un ambiente sigur pa residente- i habitantenan) pa evitá ku dokumentonan ta bai pèrdí.  

Minister Martina a para ketu na kiko ta vishon di Kòrsou pa loke ta trata wardamento di dokumento di un forma digital. Esaki ta enserá warda i konservá dokumentonan via un sistema elektróniko, pues via data, den ‘cloud’ òf na un otro pais manera por ehèmpel Hulanda. Ku e meta final pa tur kos bira aksesibel via internèt. Huntu ku UNESCO i Hulanda ta trahando duru pa bini ku un e-depot den futuro, pa asina por garantisá ku nos herensia ta keda bon wardá.

Ministerio konserní