Publiká riba 25 Aprel 2024
Willemstad – ‘Actiecentrum Ondermijning Curacao’ (ACOC) resientemente a organisá un enkuentro, den kual diferente partner den kadena hustisial a bini huntu. E enkuentro akí tabatin komo tema: ‘Problemátika di arma di kandela na Kòrsou’. Durante di e enkuentro akí a presentá un plan di aserkamentu pa atendé ku e problemátika di arma di kandela mas efektivo i integral na Kòrsou.
E plan di aserkamentu akí ta basá riba algun seshon temátiko ku ACOC a organisá, kaminda diferente partner ta bini huntu pa yega na un aserkamentu integral i dor di traha huntu, resolvé sierto problemátikanan di kriminalidat. E partnernan ku tabata presente, kual ta Kuerpo Polisial Kòrsou (KPC), Koninklijke Marechaussee, Wardakosta Kòrsou, Ministerio Públiko, Duana, Interpol i Ministerio di Hustisia a haña oportunidat pa duna sugerensianan riba e plan di aserkamentu.
Banda di e aspekto di arma di kandela i trafikashon di arma di kandela ilegalmente, a para ketu tambe na regulá e sirkuito di arma di kandela legal mas mihó.
KPC tin un ròl krusial den e proseso akí i ta yuda kordiná pa yega na konkretisashon di e plan aki. Trahando huntu ku tur partner enbolbí, ke yega na resultadonan konkreto i a la bes subi e nivel di seguridat den nos komunidat.
ACOC ta duna un plataforma pa partnernan públiko i privá yega na otro i desaroyá un aserkamentu integral pa un problemátika di kriminalidat, den kual kada organisashon ta wak for di su propio tarea i posibilidatnan legal kiko nan por nifiká den e aserkamentu. ACOC ta resortá bou di Ministerio di Hustisia.
