Publiká riba 07 Ougùstùs 2026
Willemstad, 7 di ougùstùs 2026 – Konseho di Minister a disidí di prolongá e periodo di registrashon di e proyekto Rib’e Lugá ku tres luna. Ku esaki, registrashon lo keda habrí te ku 31 di òktober 2026.
Rib’e Lugá a ser establesé pa brinda personanan ku ta kumpli ku e kondishonnan e posibilidat pa registrá nan situashon di estadia di un manera kuidadoso. Di e forma aki, e proyekto ta kontribuí na un maneho di migrashon aksesibel i responsabel, ta fortalesé seguridat hurídiko pa e personanan envolví i ta brinda Gobièrnu un mihó bista riba e situashon di estadia di personanan na Kòrsou.
For di inisio di e proyekto riba 1 di mei 2026, hopi persona a hasi uso di e posibilidat pa registrá. Na mes momentu, e eksperensianan di e lunanan ku a pasa a brinda informashon i siñansa balioso. A resultá ku un parti di e grupo tin mester di mas tempu, guia personal i sosten pa por pasa kompletamente i ku e kuido debido dor di e proseso di registrashon. Ademas, durante ehekushon a surgi algun asuntu práktiko relashoná ku e proseso, ku ta ser atendé huntu ku e partnernan envolbí.
E prolongashon ta un eskoho konsiente pa realisá e metanan di e proyekto lo mas kompleto posibel. E periodo èkstra ta brinda partisipantenan e oportunidat pa finalisá nan registrashon ku debido kuido i hasi uso di sosten ku ta kuadra ku nan situashon personal. Na mes momento, e ta brinda espasio pa hasi uso di e eksperensianan optené i fortalesé e ehekushon di e proyekto kaminda ta nesesario.
Minister di Hustisia Shalten Hato ta splika e desishon di e siguiente manera:
“Rib’e Lugá ta un proyekto importante ku ta kontribuí na un maneho di migrashon kuidadoso i aksesibel. E eksperensia di e lunanan ku a pasa ta mustra ku un parti di e grupo di indokumentado ku ta nos meta tin mester di mas tempu i guia personal. Ku e prolongashon aki nos ta skohe konsientemente pa kalidat i kuido, pa asina mas tantu persona posibel ku ta kumpli ku e kondishonnan por finalisá nan registrashon di un bon manera. Di e forma aki nos ta sirbi tantu interes di e personanan envolví komo interes di Kòrsou.”
Ministerio di Hustisia lo sigui guia e ehekushon di Rib’e Lugá ku atenshon, huntu ku e organisashonnan ehekutivo i partnernan sosial envolví. Lo hasi uso di e lunanan benidero pa alkansá e parti restante di e grupo lo mihó posibel i brinda partisipantenan e sosten ku nan tin mester di dje pa finalisá e proseso di registrashon ku éksito.
Un yamada na tur persona ku ta pertenesé na e grupo di personanan indokumentá i ku ainda no a registrá pa hasi uso di e periodo di registrashon prolongá i no warda te último momento.
Pa mas informashon tokante e prosedura di registrashon, e kondishonnan i e dokumentonan nesesario, interesadonan por akudí na e kanalnan ofisial di komunikashon di e proyekto Rib’e Lugá.
[FIN DI KOMUNIKADO]
