Publiká riba 15 Desèmber 2019
WILLEMSTAD- Ministerio di Desaroyo Ekonómiko (MEO) a anunsiá na doñonan di standplaats pafó di sentro di siudat ku e término di transishon pa por kumpli ku kontenido di e maneho di standplaats a keda prolongá te ku djadumingu 15 di mart 2020. Sinembargo e término aki lo NO ta vigente pa standplaatsnan ku a keda establesé despues di e inventarisashon di standplaatsnan ku a keda hasí.
Den un komunikado ku MEO a emití djaluna último dia 9 di desèmber, e ministerio a anunsiá ku Konseho di Minister a bai di akuerdo pa prolongá e ultimatum ku doñonan di standplaats ta risibí pa por drecha nan establesimentu di akuerdo ku loke maneho di standplaats ta eksihí.
E periodo di transishon aki sinembargo no ta konta pa standplaatsnan ku a keda estables’é despues di e inventarisashon di standplaatsnan ku a keda hasi na sèptèmber di aña 2018. E inventarisashon tabata pa e ministerio por tin un mihó bista di e kantidat, tipo i sitionan di standplaatsnan eksistente. For di e esaki a sali un total di 89 standplaats pa kendenan e periodo di transishon te ku 15 di mart 2020 ta vigente.
Tur standplaats ku a keda establesé durante e periodo di moratorio ku a tuma lugá entre febrüari 2018 te ku 15 di desèmber 2018 i ku no a kai den e inventarisashon lo mester ser kitá di forma inmediato. Si akaso ku durante kontrol di e tim di inspekshon ekonómiko tuma nota di standplaatsnan ku a keda den operashon apesar di esaki i ku no ta dispone di e pèrmitnan nesesario, esaki lo wòrdu kitá riba gastu kompleto di e doño di e standplaats en kuestion.
