Notisia

WILLEMSTAD- Tur aña di nobo, selebrashon di Dia di Rei ta trese un ambiente formidabel entre otro den nos sentro di Siudat i alabes ta duna un impulso na desaroyo di nos ekonomia. Den kuadro di preparashonnan pa selebrashon di Dia di Rei 2023,  Ministerio di Desaroyo Ekonómiko (MEO)  ta hasi un yamada na tur persona ku ta interesá pa bende kos den sentro di siudat riba e fecha aki pa hasi petishon na tempu pa nan pèrmit temporal pa bende produkto òf duna servisio. Esaki ta konta tantu pa pèrmitnan temporal di ‘standplaats’ (para bende produkto òf servisio na un sitio fiho) òf ‘vent’ (kana bende produkto òf servisio di forma ambulante). Tur persona interesá mester aserká organisadó di e evento, kende na su turno lo entregá petishon pa un pèrmit kolektivo pa tur persona ku lo bende kos den e zona ku e ta manehá. Aparte di e petishon pa pèrmitnan di ‘standplaats’ i ‘vent’, kada organisadó mester sòru tambe pa nan propio pèrmit di evento (Evenementenvergunning). E petishon pa un pèrmit di evento mester keda entregá pa mas tardá djaweps, 30 di mart próksimo pa e pèrmit por keda kla na tempu. Esnan ku ke organisá evento dia 26 di aprel tambe, mester entregá e petishon pa pèrmit mas tardá djarason dia 29 di mart.

For di aña 2020 Konseho di Minister a bai di akuerdo pa en konekshon ku e selebrashon di Dia di Rei repartí sentro di siudat den 6 zona:

• Zona 1: E área rondó di Marshe Rondó, inkluyendo Plasa Wilson ‘Papa’ Godett (plenchi dilanti di Pòstkantor) i de Ruyterkade kompleto (for di Sha Caprileskade te na e skina di Handelskade)
• Zona 2: Tur e hanchinan di Punda kaminda normalmente sa tin marshe/aktividat durante Dia di Rei, inkluyendo Plasa Jojo Correa, Gouvernementsplein, Wilhelminaplein, Hendrikplen i Waterfortplein.
• Zona 3: Nieuwestraat i Kaya Wilson ‘Papa’Godett (Pietermaai).
• Zona 4: Breedestraat Otrobanda te na Frederikstraat (e kaya enfrente di Netto Bar).
• Zona 5: Molenplein te na Sebastopolstraat (stashon di bùs) i Awasá (Fuik).
• Zona 6: Brionplein.

Pa un pèrmit di ‘standplaats’ òf ‘vènt’ pa bende kos den kualke un di e zonanan ariba menshoná riba Dia di Rei 2023, mester aserká direktamente e organisadó ku tin maneho di e zona, esta:

Zona 1: Fundashon Marshe (+5999 511-1176)
Zona 2:  Dutch Dream Special Events ( +5999 461-9393)
Zona 3: Paul Lebbink (+5999 512-5777)
Zonanan 4 i 6:  Sosiedat di Komersiantenan di Otrobanda (SKO) (+5999 462-3591)
Zona 5: Enrich (+5999 682-8053)

MEO ta urgi tur persona ku ta deseá di bende produkto òf duna un servisio den sentro di siudat riba Dia di Rei 2023, pa tuma kontakto ku e organisadó konserní mas pronto posibel pa mas informashon, komo ku e organisadónan tin te ku djaweps, 6 di aprel 2022 pa entregá e petishon pa e pèrmitnan di tantu ‘standplaats’ komo ‘vènt’.

Pa mas informashon tokante dokumentonan nesesario, tarifanan i informashon general tokante e pèrmit di evento, por bishitá e página di Lokèt di Pèrmit riba www.gobiernu.cw . Pa informashon tokante pèrmitnan di  temporal di ‘standplaats’ i ‘vènt’, por klek riba e nòmber di e pèrmit konserní riba e vershon di e komunikado akí riba gobiernu.cw.
Tambe por tuma kontakto libremente ku e organisadó konserní òf ku Lokèt di Pèrmit na numbernan di telefòn  433-3123.

MAS NOTISIA

Ministerio konserní: Desaroyo Ekonómiko