Notisia

Outoridatnan gubernamental ta úrgi tur negoshante pa informá nan mes debidamente tokante pèrmitnan nesesario pa por hasi negoshi di importashon

Willemstad – Outoridatnan gubernamental a risibí riba djaweps dia 10 di yanüari 2019 e petishon di e kompania Inter Caribbean Trading & Shipping N.V pa un pèrmit, den kuadro di ʹHinderverordening Curaçaoʹ. Esaki ta nifiká ku instanshanan konserní ta kuminsá ku e proseso di investigashon pa por disidí si e kompania ta bin na remarke pa un pèrmit nesesario. Si  e kompania, pa falta di e kriterionan nesesario, no ta bin na remarke pa e pèrmit nesesario, Gobièrnu di Kòrsou por duna e kompania òrdu pa mésora sòru pa e kombustibel sali for di Kòrsou. Si e kompania haña e pèrmit, no ta nifiká ku e tin mag di bende su produkto na komunidat, pasobra e no tin pèrmit komo pomphouder i aktualmente no ta duna pèrmit pa esaki tampoko.

E petishon di e kompania a yega despues di varios bishita di kòntròl di e Tim Multidisiplinario Gubernamental. Na diferente okashon a menshoná na e kompania ku nan no tin e pèrmitnan nesesario, pa loke ta trata e kombustibel ku nan a importá. Despues di e último bishita di e Tim Multidisiplinario riba djaweps dia 10 yanüari 2019, Polis i Brantwer a konstatá tambe ku e manera kon a warda e kombustibel, ta forma un peliger pa seguridat di komunidat. Outoridatnan a  seya e tankinan riba e tereno kaminda e kompania konserní tin un montante di 59.800 liter di gasoil wardá. Ta trata di un parti di e montante total di 550.000 liter di gasoil, ku a yega Kòrsou for di dia 9 di desèmber último.

Kada negoshante tin e deber di sa adelantá kiko tur e tin ku tene kuenta kuné ora ta trata di importashon di kualke produkto, i sigur ora ta trata produktonan ku por okashoná molèster. Promé of mésora e produktonan ta yega Kòrsou, e kompania mester hasi lo siguiente:

• Hasi ʹinklaringʹ serka douane;
• Hasi deklarashon na douane (kiko bo ta importá);
• Tuma kontakto ku otro instansianan konserní pa otro rekesitonan;
• Hasi petishon di e rekisitonan (p.e. Vestigingsvergunning di e kompania konserní (MEO) òf Hindervergunning ora e produkto por okashoná molester (GMN);
• Den kuadro di kombustibel e produkto mester kuadra ku eksigenshanan di kalidat manera stipulá dor di BTP;
• Transportashon di produktonan mester bai den tankwagen adekuá ku tin sertifikado di fábrika + sertifikado di aprobashon di IJkwezen + Hindervergunning. Pa evitá desgrasia mester pidi guia pa e transporte na polis;
• Pa por warda e produkto mester di hindervergunning + bouwvergunning.

Pa motibu ku e kompania Inter Caribbean Trading & Shipping N.V no ta tin e ʹhindervergunningʹ menshoná i no tabata kuadra ku eksigensianan manera stipula den Hinderwetverordening tokante medio ambiente, Ministerio di Salubridat Públiko, Medio ambiente i Naturalesa (GMN) a para e aktividatnan di e kompania pa medio di un ʹMinisteriele Beschikkingʹ  riba dia 21 di desèmber último. Tambe a ordoná e kompania pa saka e produkto, ku por sierto ta forma un pelíger tambe pa komunidat, for di teritorio di Kòrsou. E kompania ta tin dos siman pa hasi esaki. Riba dia 24 di desèmber e barku ku sobrá di e gasoil (490.200 liter) a bandoná Kòrsou. Sobrá di e gasoil ainda ta na e adrès di e kompania riba un tereno industrial na Heintje Kool.

MAS NOTISIA

Ministerio konserní: Salubridat Públiko, Medio Ambiente i Naturalesa