Bo opinion

Notisia

Petishon ofishal pa Kòrsou fungi komo sentro logístiko (hub) a drenta.

Geplaatst op 17 February 2019 dor di Ministerio Asuntunan General i Promé Minister

Willemstad – Djasabra dia 16 di febrüari ku a pasa, Gobièrnu di Kòrsou a risibí e petishon ofishal for di Merka pa fungi komo sentro logístiko (hub) pa produktonan di nesesidat humanitario pa e pueblo Venezolano. Siguiente paso ta ku Gobièrnu lo traha un kontesta riba e petishon, ku tur eksigensia di Kòrsou, inkluso e eksigensianan i prekupashonnan ku stakeholders manera mundu empresarial i mundu sindikal a ekspresá na Gobièrnu den e dianan tras di lomba. Via kontaktonan polítiko i diplomátiko, tantu di Kòrsou mes i via Hulanda, e eksigensianan ta keda komuniká. E eksigensianan lo konta pa tur pais i tur organisashon humanitario ku ke traha ku Kòrsou pa aliviá e situashon na Venezuela.

Importante den Kòrsou su posishon ta ku nos lo fungi solamente komo depósito pa kuminda, remedi, awa i otro nesesidatnan humanitario, ku un gran parti di e pueblo Venozolano tin mester di dje. Diferente organisashon humanitario for di rònt mundu, no solamente di Merka of Hulanda, pero tambe di otro parti di mundu, lo transportá i organisá distribushon di e produktonan di nesesidat pa i na Venezuela. Esaki solamente ta bira posibel ora tin sirkumstansianan liber i sin konflikto rondó di e ayudo humanitario.

Kòrsou niun ora lo no pèrmití pa fòrsa transporte di produktonan for di nos teritorio, si no tin un situashon ku ta permití e ayudo drenta sin krea konflikto i asina keda repartí na tur Venezolano. Tambe sin riesgo pa esnan ku ta envolví den distribushon di yudansa. Kòrsou no ke mete den asuntonan polítiko di un nashon bisiña. Alabes Kòrsou no ta akseptá na niun momento mes ku lo hasi uso di material militar pa trese e yudansa humanitario pa Kòrsou den deposito, tan ten ku no tin un tipo di areglo na Venezuela mes pa e yudansa por drenta Venezuela. Asina ta evitá kualkier malkomprendimiento of impreshon robes ku Kòrsou ta envolví den un operashon militar.    

Pa loke ta trata e prekupashon ku Defensa na Parera i FOL na Hato lo tin algu di haber ku e proyekto di stashoná produktonan humanitario na Kòrsou, Gobièrnu i e organisashonnan ei ta masha kla. Defensa na Parera tei pa hopi aña kaba, pa defendé nos teritorio komo parti di Reino. Defensa lo no tin nada di haber ku e proyekto pa yuda e pueblo Venezolano ku produktonan di nesesidat. FOL, ku ta para pa “Forward Operation Location”, no ta un base militar. E tratado ku Kòrsou tin pa loke ta trata FOL, ta limitá e uso. Merka solamente por hasi trabou via FOL ora tin di haber ku kontrolá, alarmá i aktua kontra di trafikashon di droga. Nan no tin niun outoridat pa otro tipo di aktividat. Pa e motibu ei mes, Gobièrnu ta pone nos aeropuerto na disposishon di e operashon humanitario, ménos e parti kaminda FOL ta lokalisá.

Den un karta pa sindikatonan, Gobièrnu lo duna kontesta riba diferente prekupashon ku esakinan a ekspresá den un karta ku nan a entregá djabièrnè na Promé Minister Eugene Rhuggenaath. Durante e dianan den wikènt, Gobièrnu a reuní tambe ku diferente stakeholders, manera sindikatonan i representantenan di mundu empresarial durante varios reunion, entre otro den kuadro di Diálogo Nashonal. A papia habrí tokante e prekupashonnan, pero tambe tokante e oportunidatnan ku e desishon pa bira un depósito pa produktonan di nesesidat por trese pa Kòrsou. Gobièrnu te dispuesto pa tene mas reunion informativo ora esaki ta deseá di parti di stakeholders.

Mundu empresarial a mustra riba e oportunidat i obligashon di por yuda e pueblo Venezolano ku ta den nesesidat, pero tambe a ekspresá e oportunidatnan ekonómiko pa Kòrsou den henter e trayekto. Nan ta miré komo un oportunidat ku por duna netamente un stimulashon na e situashon difísil di Kòrsou su ekonomia. Esaki pa motibu ku pa e trayekto, lo tin mester di bastante espasio pa warda e produktonan i ku lo por buska sierto produkto i servisio den merkado lokal. Kòrsou por profilá su mes komo sentro logístiko internashonal dilanti mundu henter, i esaki por stimulá nos sektor logístiko den futuro. 

 Suptítulo foto: Konsulta entre Gobièrnu di Kòrsou i representantenan di mundu empresarial.

Ministerio konserní