Plan pa proyekto Mantenshon Edifisionan di skolnan - Informashon tokante Gobièrnu di Kòrsou Bo opinion

Notisia

Plan pa proyekto Mantenshon Edifisionan di skolnan

Geplaatst op 08 November 2021 dor di Ministerio Enseñansa, Siensia, Kultura & Deporte

WILLEMSTAD –  Minister di Enseñansa, Siensia, Kultura i Deporte (ESKD), sr. Sithree ‘Cey’ van Heydoorn huntu ku Ministerio di Binnenlandse Zaken en Koninkrijksrelaties (BZK) di Hulanda ta den diálogo ku e organisashonnan ‘Policy Productions’, Stichting Onderhoud Schoolgebouwen (SOS) i Fundashon Reda Sosial. Nan ta trahando riba un plan di ehekushon pa drecha i hasi mantenshon di e edifisionan di skol.  E plan aki a sali foi di e akuerdo entre Hulanda i Kòrsou, den kuadro di e ‘Landenpakket’. E fondo di 30 mion euro ku a keda reservá pa e trayekto aki ta kai temporalmente bou di e maneho di COHO. Segun e proyekshon e mantenshon di skolnan ta inisiá na aña 2022.

Durante e periodo di febrüari 2021 te ku ougùstùs 2021 a usa un total di mei mion euro di e fondo pa drecha skolnan, kaminda un ‘quick scan’ a mustra riba urgensia. Teniendo kuenta ku e desaroyo aki, for di novèmber 2020 Ministerio di ESKD a inisiá un trayekto pa inventarisá e situashon di tur e edifisionan di skolnan. E inventarisashon aki tabata pa kontrolá i definí e situashon inisial di lokalidat, situashon di elektrisidat i awa, fasilidat di ICT i infrastruktura di e edifisionan. E datonan aki a keda kla for di mart 2021 i ta e base pa e plan di mantenshon pa e skolnan.

Ministerio di BZK a duna Policy Productions e tarea pa, huntu ku Ministerio di ESKD, Reda Sosial i SOS, traha riba un plan di ehekushon huntu ku tur direktivanan di skol. Policy Productions a hasi un bishita na un total di 14 skol, a tene reunion ku vários partner manera direktivanan di skol, Aqualectra i Digicel, i a tuma nota di e situashon general. Tambe nan a tene un reunion ku Minister di ESKD sr. Sithree ‘Cey” van Heydoorn pa duné un relato ku tur informashon i dato ku nan a kolektá. Ku e bishita aki, awor Policy Productions ta bai traha e plan di ehekushon komo un proposishon pa por kuminsá traha i haña e fondonan reservá ku ta forma parti di e ‘Landenpakket’, konforme palabrashon entre Kòrsou i Hulanda.

Despues di nan bishita, Policy Productions a sigui traha riba un norma di kalidat di edifisio, huntu ku e diferente organisashonnan manera SOS, Reda Sosial i e direktivanan di skolnan. Banda di esei un di dos enkuentro ku tur direktiva a tuma lugá den luna di òktober 2021. Den luna di novèmber ta sigui algun enkuentro mas di forma virtual.

Ministerio di ESKD ta sigui traha huntu ku tur e organisashonnan envolví, pa drecha nos enseñansa pa asina nos muchanan por tin un mihó trayekto eskolar pa nan por yega na potenshal máksimo den desaroyo komo suidadano.

Ministerio konserní