Plan stratégiko di desaroyo di 10 aña pa sektor di yachting na Kòrsou - Informashon tokante Gobièrnu di Kòrsou

Notisia

Ministerio konserní Desaroyo Ekonómiko
 

Plan stratégiko di desaroyo di 10 aña pa sektor di yachting na Kòrsou

Publiká riba 29 Òktober 2020

WILLEMSTAD- Resientemente e industria di marina i yachting na Kòrsou a keda identifiká komo un di e sektornan ku potensial grandi pa desaroyo di Kòrsou su ekonomia. Ku bista riba e potensial aki, Ministerio di Desaroyo Ekonómiko (MEO) a kanalisá e formulashon di un “Plan stratégiko di Desaroyo pa e sektor di Yachting Turístiko” na Kòrsou pa e próksimo 10 añanan. Desaroyo di e strategia aki a keda kordiná pa e Yachting Taskforce (YTF) i finansiá pa Stichting Ontwikkeling Projecten Logistieke Sector (SLS).

E plan stratégiko a keda aprobá pa Konseho di Minister ayera, djárason 28 di òktober. Meta di e strategia ta, pa establesé i krese desaroyo di yachting na Kòrsou di un forma diversifiká i hisa su kontribushon na kresementu duradero di nos ekonomia.

Den e “Strategia di Desaroyo pa e sektor di Yachting Turístiko” ta suprayá e echo ku Kòrsou ta disponé di un sektor di yachting sumamente vibrante ku na e momentunan aki entre otro ta keda karakterisá pa diferente marina. Na mes momentu, tin hopi oportunidat pa sigui desaroyá e sektor aki na Kòrsou, spesialmente e merkado di bishitantenan ku yatenan di diferente midí na nos pais.

E “Strategia di Desaroyo pa e sektor di Yachting Turístiko” ta enfoká tambe riba ophetivonan importante manera entre otro regulashon i proseduranan, maneho i kontrol, oportunidat di servisionan i mantenshon, fasilidat i infrastruktura di yachting, merkadeo i promoshon.

Desaroyo di e sektor di yachting i marina na Kòrsou i e prospekto pa alkansá su máksimo potensial, ta dependé kon eksitoso nos ta den implementashon di e faktornan di éksito ku a keda identifiká den e “Strategia di Desaroyo pa e sektor di Yachting Turístiko” aki.

Kòrsou lo usa e plan aki komo e ruta pa desaroyo i mehorashon di e sektor di yachting den nos pais. MEO ta premirá ku e plan aki por trese un kontribushon positivo na nos ekonomia i un diversifikashon di nos produkto turístiko. Desaroyo di e sektor di yachting lo generá kuponan di trabou direkto i indirekto pa nos yunan di tera i tambe mas entrada pa nos Gobièrnu. 

 

E plan stratégiko aki a keda presentá komo parti di un presentashon di e Kuadro Ekonómiko Duradero. Klek aki pa ‘download’e presentashon: https://bit.ly/3jNKTa1