Publiká riba 10 Yanüari 2018
Willemstad – Servisio pa Obra Públiko (OW) ta pone mata den e bakinan meimei di kaminda i e plenchi dilanti di Lanthùis Savonet riba Weg naar Westpunt na altura di Wacawa/Boka Tabla. E trabounan aki a kuminsá djaluna 8 di yanüari 2018 i ta dura mas o ménos 2 siman. Kwekerij Exotische Tuinen N.V. ta enkargá ku e trabounan. Ku esaki, Minister Zita Jesus-Leito ta traha pa alsa seguridat di tráfiko den e área.
Banda di adaptashonnan hasí na e kaya aki, e mata tambe lo yuda na konsientisá i alertá outomobilistanan pa nan sa ku nan ta drenta área di bibienda i rekreashon. Tambe e ta yuda pa e plenchi dilanti di e lanthùis bira aun mas bunita.
Ta sera parti di e kaminda pa tráfiko i na algu sitio lo desviá tráfiko. Lo tin bòrchi pa guia e outomobilista. Ta pidi tur outomobilista pa tene kuenta ku e desviashonnan i kore ku koutela.
Via di e komunikado aki, OW, i Kuerpo Polisial Kòrsou ta pidi pasenshi pa eventual molèster pa e kambionan temporal. Pa kualke pregunta tokante e proyekto por tuma kontakto ku OW via e number 433-4237, Whats app +5999511-8582 òf via di e-mail info.vvrp@gobiernu.cw.
