Importansha di Plasa Bieu
Plasa Bieu,ku a nansé komo marshe públiko den sentro di siudat, ta marka historia ekonómiko komo e promé merkado lokal. Ku, despues di apertura di Marshe Nobo, a konbertí den un sentro kultural, ofresiendo kushina krioyo outéntiko na habitantenan i bishitantenan di nos isla. Su importansha ekonómiko ta grandi, ku potenshalmente mas ku trinta kupo di trabou, formando ademas un merkado importante pa produktonan lokal di nos sektor di agríkultura. Komo atrakshon turístiko ku por kompetí sin mas ku sitionan semehante na Port-of Spain, San Jose (Costa Rica), Miami, Paris, Barcelona i Singapore, e ta marka nòmber di Kòrsou riba merkado internashonal.
E proseso di konservashon i renobashon di Plasa Bieu
Den su afan pa konservá e importansha i e uzo di e edifisio, Fundashon Marshé a pone énfasis riba aspektonan di kalidat manera infrastruktura, higiena, salú, ambiente i seguridat. A renobá kompletamente e infrastruktura di koriente i di ventilashon. Pa máksimo higiena i salú, a inverti den un flur kompletamente nobo, ku un akabado idéntiko na esun empleá pa Hospital Nobo: higiéniko, duradero, i fásil pa tene limpi. Ademas, a introdusí un plafòn será pa eliminá formashon di stòf ku ta bin kai riba mesa. A sera e kushinanan parti patras di e edifisio kontra invashon di djaka. Pa un mihó ambiente, a krea ventilashon i lus natural den e espasio sentral, dor di instalá apertura pa bientu fresku den kumbre di e dak, i apertura di glas ku ta trese lus di dia den e sala sentral, sin kayente direkto di solo, pa un mihó ambiente.Kalidat di airu en general a keda optimalisá ku instalashon nobo i mas poderoso pa chupa huma, kargá riba su propio pia, na lugá di kologá nan peso na e dak. Finalmente, a remplasá tur platchi di dak bieu ku asbest aden ku platchi idéntiko, liber di asbest. Seguridat ta optimal, ku e flur nobo, i medidanan pa kaso di kalamidat manera kandela.
Esnan ku a karga e proseso di renobashon di Plasa Bieu
For di kuminsamentu por a konstatá un gran empeño di parti di direktiva i personal di Fundashon Marshe Nobo pa logra e proyekto aki. I no solamente dor di atraé finansiamentu, pero partisipando intensivamente den e proseso di konsebí e konsepto di tradishon, mérito kultural, balor ekonómiko i di merkadeo turístiko, na un manera efektivo, duradero, i ku ménos gastu posibel. Tur esaki den amplio konsultashon ku, i gran interes i partishipashon di parti di e hürdonan di e kushinanan, Pa despues atendé ku mesun entusiasmo e preparashon i vigilansha di ehekushon di e proyekto. Apresio speshal ta bai pa tur e instanshanan di gobiernu ku a duna nan aporte eksperto riba nan respektivo tereno di responsabilidat: Departamento di Salubridat, Inspekshonnan di Labor i Seguridat di Trabou, Kuerpo Polisial, Brantwer, DOW i ROP. Esnan kontratá pa ehekushon di e numeroso trabounan tabata kontratista general Excelco Bouw, Bolidt (flur nobo),The Asbest Specialist (eliminá asbest), Aquatech (ret di awa i kloaka), GEWI (sistema di koriente i lus), Supreme Restaurant Equipment & Supplies (instalashonnan di ekstrakshon i ventilashon; aparatura di kushina), i Curgas (instalashon di gas). Ofisina di arkitekto i ingeniero PLAN’D2 tabatin e honor i responsabilidat di diseñá, prepará, i tene destaho pa e proyekto den estrecho kontakto ku Fundashon Marshe Nobo, guiando e tim di ekspertonan riba kada tereno di preparashon i di trabou, organisando reunion di trabou, i supervisando tur trabou di ehekushon.
