Publiká riba 23 Mart 2023
Willemstad – Riba djaweps 23 di mart, Minister Cooper huntu ku Servisio pa Planifikashon Urbano (ROP) a hasi entrega di un pèrmit di konstrukshon na Minister Ruisandro Cijntje di Ministerio di Desaroyo Ekonómiko, i Sra. Braaf di Fundashon Marshe pa renobashon di Plasa nobo den Punda.
Plasa nobo ta un edifisio historíko pa pais Kòrsou kaminda diferente aktividat a tuma lugá atraves di añanan. Lo renobá esaki kompletamente pa asina e bira mas atraktivo tantu pa lokal komo pa turista. Tambe, lo krea un plataforma kaminda por para i disfrutá di un bunita paisahe.
Manera Minister Cijntje a enfatisá ta importante pa e hòmber chikí tambe tin un kaminda pa e por hasi su negoshi. Atraves di e proyekto di renobashon aki, por logra esei.
Durante di e promé fase lo invertí un promedio di 1.1 mion florin pa despues kontinuá ku mas invershon.
Minister Cooper ta deseá Minister Cijntje i Fundashon Marshe tur klase di éksito ku e bunita proyekto aki.
