Plataforma di Kambio Klimátiko di Kòrsou Ta Organisá e di 3 Seshon pa Promové Akshon Kolektivo
Publiká riba
26 Novèmber 2024
Willemstad – Plataforma di Kambio Klimátiko di Kòrsou tin honor pa invitá pueblo di Kòraou na di 3 Seshon di Plataforma di Kambio Klimátiko di Kòrsou, ku lo tuma lugá riba djabièrnè 29 di Novèmber 2024, for di 8or di mainta te 6or di atardi na Banko Sentral di Kòrsou i Sint Maarten.
E evento importante aki lo reuní eksperto, manehadónan den polítika, lidernan di negoshi, NGO-nan, i suidadanonan preokupá, ku ta komprometé pa enfrentá e desafionan urgente di kambio klimátiko. Den kolaborashon i diálogo, e seshon ta destiná pa fortalese resiliensia i desaroyo sostenibel pa Kòrsou, stimulá solushon innovativo i tuma akshon desisivo.
Señor Albert Martis, Presidente di Plataforma di Kambio Klimátiko di Kòrsou, ta enfatisá importansia di e evento:
“E efekto di kambio klimátiko no ta posibel pa neglishá, i nos mester aktua awor pa garantisá un futuro sostenibel. E plataforma aki ta duna nos un oportunidat úniko pa unifiká esfuersonan, interkambiá eksperensia, i tuma paso nesesario pa protehá nos isla.”
Partisipantenan lo partisipá den diskushonnan, tayer-nan i presentashonnan riba resiliensia klimátiko, energia renovabel, i konservashon di medioambiente. E seshon aki ta marka un paso importante den kompromiso di Kòrsou pa mitigá e impakto di kambio klimátiko i kreá un futuro sostenibel.
Pa mas informashon òf pa registrá por usa e link aki: https://docs.google.com/forms/d/e/1FAIpQLSeV9s8drqkuncFNcN1gVj0FZBxeEiggskUxe-vi55zBBZuztg/viewform
