Publiká riba 17 Sèptèmber 2020
Willemstad – Na aña 2015 Komishon di Derechi di Mucha a duna Reino Hulandes konseho ku entre otro Kòrsou mester enbolbí hóbennan den tomo di desishon tokante nan bienestar. Den artíkulo 12 di tratado di derechi di mucha ta pará entre otro ku Gobièrnu mester sòru pa skucha opinion di mucha.
Tratado Internashonal di derechi di mucha ta indiká den artíkulo 12 ku:
“Tur mucha tin e derechi di duna su mes opinion. Sigur si ta trata tópikonan ku tin un relashon ku nan. No solamente mester puntra pa nan opinion, pero mester skucha nan tambe. Gobièrnu mester sòru pa skucha opinion di muchanan.”
Famia i Hubentut di Ministerio di Desaroyo Sosial, Labor i Bienestar ta enbolbí ku koordinashon di Plataforma Derechi Internashonal di Mucha (Plataforma IVRK). Un grupo di trabou ku ta hopi esensial den e plataforma aki ta esun di hóben. Plataforma IVRK ta bai lansa e grupo di trabou di hóben. E meta dje grupo di trabou aki ta pa hóbennan di 13 pa 20 aña haña posibilidat pa por trese nan punto di bista dilanti i diskutí riba diferente aspekto ku ta trata nan desaroyo i tambe bin ku solushon i sugerensia pa tene kuenta kuné den arianan di maneho di Kòrsou.
E konsehonan i proyektonan pa hóben lo bai via di Plataforma IVRK na gobièrnu i parlamento. E hóbennan lo haña oportunidat pa bini ku plannan i ideanan pa kambio. Ku esaki ke logra pa mas tantu hóben posibel ta aktivo den desishonnan ku ta konserní nan.
E plataforma lo konsistí di 15 hóben ku ta enbolbí den diferente aria entre otro: deporte, parlamento hubenil, skout, hustisia i arte. E enfoke ta riba un grupo miksto pa asina por haña opinion for di diferente kuadro di referensia.
