Bo opinion

Notisia

IVRK ta para ketu na Dia Internashonal di Derechi di Mucha

Geplaatst op 19 November 2019 dor di Ministerio Desaroyo Sosial, Labor i Bienestar

Pa medio di diferente programa di konsientisashon den kolaborashon ku otro organisashonnan


Willemstad –Nashonnan Uní a proklamá 20 di novèmber komo Dia Internashonal di Derechi di Mucha. Ta selebrá e dia aki tur aña i meta di e dia aki ta pa mundu realisá ku mucha mester ta pará sentral den loke nos ta hasi. Ademas e aña aki ta konmemorá ku 30 aña pasá Asamblea General di Nashonnan Uní a aseptá e asina yamá Konvenshon tokante Derechi di Mucha, un tratado internashonal ku ta rigi derechi di mucha. Na Kòrsou Plataforma IVRK ta selebrá e dia aki pa medio di diferente aktividat dirigí riba konsientisashon, den kolaborashon ku diferente organisashon.

Ta korekto ku ratifikashon di un tratado manera esun di Nashonnan Uní tokante derechi di mucha tin benefisio pa e muchanan mes, te na momentu ku e pais ku a ratifik’é hasi e adaptashonnan nesesario den entre otro su kuadro legislativo. Esaki ta algu ku Kòrsou ta trahando riba dje. E akshon mas resien ku ta un señal ku Kòrsou ta trahando na mihó implementashon di e tratado ta e Plataforma IVRK (pa su abreviashon na ulandes) ku a keda instrituí aña pasá. E plataforma aki tin komo tarea pa logra un mihó implementashon di e tratado. E 4 ministerionan ku ta traha direktamente ku e áreanan di maneho inkluí den e tratado ta: Ministerio di Desaroyo Sosial, Labor i Bienestar, Ministerio di Enseñansa, Siensia, Kultura i Deporte, Ministerio di Hustisia i Ministerio di Salú, Medioambiente i Naturalesa. Huntu ku e ministerionan aki tin diferente otro organisashon ku ta forma parti di e plataforma. Ta trata aki di organisashonnan gubernamental i no-gubernamental.

Plataforma IVRK ta di opinion ku tin bastante trabou pa hasi ainda, pero tin motibu pa selebrá tambe. Na 1998, e aña ku Antia Ulandes (lesa Kòrsou) a ratifiká e tratado, no tabatin e kantidat di programanan interaktivo di konsientisashon ku tin aktualmente. I konsientisashon ta e promé paso pa por realisá kambio. E aña aki tin vários programa di konsientisashon relashoná ku konmemorashon di e dia importante aki.

Fundashon AJJC a lansa un kampaña di konsientisashon tokante efektonan di sla riba mucha i a hiba un kampaña via medionan di komunikashon pa alertá komunidat riba e punto aki. Stichting Help de Schoolkinderen van Curaçao a organisá un seri di charla pa inspirá i motivá hóbennan ku ta víktima di violensia doméstiko, pa nan ta na altura ku tin alternativa i tin salida pa nan situashon. Fundashon Bos di Hubentut ta bishitando skolnan pa konsientisá muchanan riba e echo ku nan por protehá nan mes dor di bisa nò na abuzu seksual. Kombiná ku esaki nan ta dunando lès di seksualidat tambe. Ademas, entrante 20 di novèmber nan lo start ku un otro kampaña di konsientisashon riba “sexting”, “bullying” i “grooming” pa medio di un funshon di sine ku hóbennan por bishitá ku skol. Sektor Famia i Hubentut di Ministerio di Desaroyo Sosial, Labor i Bienestar tambe ta inisiá un kampaña di konsientisashon na nivel nashonal riba e derechinan. Lo presentá esakinan pa medio di spòt oudiovisual na televishon i den medionan sosial. E spòtnan aki tin komo meta pa hasi adultonan konsiente riba e derechinan di mucha i pa stimulá diálogo riba e tema aki. Dia 28 di novèmber Universidat di Kòrsou, Fundashon Bos di Hubentut i Plataforma IVRK lo organisá un debate pa hóben i adulto tokante e derechinan. Riba e dia aki lo para ketu tambe na 30 aña di ratifikashon di e derechi di mucha.

Plataforma IVRK ta trahando riba diferente otro inisiativa. Por menshoná un investigashon sientífiko ku Universidat di Kòrsou lo kuminsá próksimamente kuné pa identifiká burakunan den lei i den implementashon di i kòntròl riba leinan ku ta toka mucha i tambe por menshoná introdukshon di un protokòl pa guia profeshonalnan den kon ta atendé ku sospecho di violensia kontra mucha òf kasonan komprobá di violensia kontra mucha.

Plataforma IVRK lo sigui tene komunidat di Kòrsou informá via su página di Facebook (Plataforma IVRK). Tambe por yama 434 0428 òf 434 0451 pa mas informashon.

Ministerio konserní