Publiká riba 24 Òktober 2017
Willemstad – Djasabra, 28 di òktober Servisio pa Obra Públiko (OW) ta kuminsá ku trabounan di buta drèmpel di asfalt riba Franklin D. Rooseveltweg, dilanti di Curaçao Airport Hotel, pa alsa seguridat den tráfiko. E trabounan tin un durashon di un dia i durante e periodo aki tin diferente desviashon di tráfiko pa tene kuenta kuné den e área.
Drèmpel tin e propósito pa baha e velosidat di e outomobilista di moda ku ta hisa e seguridat den tráfiko. Pa e kaya aki, esta Franklin D Rooseveltweg dilanti di Curacao Airport Hotel, esaki tambe lo ta e kaso. OW ta pidi outomobilistanan pa kore ku koutela den e área na momentu ku e trabounan ta tuma lugá durante dia. Si tur kos kana segun plan e trabounan ta finalisá riba e mesun dia.
Segun e trabounan ta tuma lugá, e kaya lo no ta aksesibel pa tráfiko. Outomobilistanan ku ta trafiká den e área mester sigui e indikashonnan den forma di flecha pa yega na nan destinashon.
Via di e komunikado aki, OW, kontratista CWM i Kuerpo Polisial Kòrsou ta pidi pasenshi pa eventual molèster pa e kambionan temporal. Pa kualke pregunta tokante e proyekto por tuma kontakto ku OW via e number 433-4327, Whats app +5999511-8582 òf via di e-mail info.vvrp@gobiernu.cw.
