Publiká riba 23 Yüli 2020
Ta baha e mínimo porsentahe di pèrdida di entrada te na 25% pa yuda mas kompania ku supsidio di salario.
WILLEMSTAD- No opstante e echo ku ainda no a logra finalisá finansiamentu di e terser transh di fiansa di Hulanda, Gobièrnu a keda komuniká ku lo hasi uso di fondonan ku a sobra di e promé i segundo transh destiná pa NOW pa por finansiá supsidio di NOW pa luna di yüli.
Despues di a konsultá, evaluá i analisá e resultadonan di e areglo di aprel te ku yüni 2020, a baha e porsentahe mínimo ku e kompania mester tin pa e por bini na remarke pa e yudansa den luna di yüli na 25% en bes di e 40% ku tabata rekerí na luna di yüni. Esaki lo duna espasio na mas kompania pa por bini na remarke. Pasó apesar ku nan a kuminsá drai bek despues ku a kita e ‘lockdown’, ainda tin hopi kompania ku ta sufri di pèrdida di entrada supstansial.
Tur sobrá kriterio ku tabata konta pa luna di yüni a keda igual pa yüli, esta por risibí supsidio pa salario te ku 60% di e pèrdida di entrada, e trahadó mester entregá 20% di su banda riba e salario bruto mensual i firma pa esaki i tambe ku e lista di sektornan ku ta bini na remarke aprobá pa Minister di Ekonomia, no a kambia. Pa mas informashon i splikashon di e areglo i loke ta su kriterionan pa luna di yüli, ta semper rekomendabel lesa e splikashon riba e website di fondo di sosten promé ku hasi e aplikashon.
Por último ta rekordá tur kompania ku ya a hasi un petishon entre aprel i yüni pa supsidio di NOW, ku nan aplikashon pa luna di yüli por bai solamente pa medio di un URL link ku nan lo risibí via di mail. Tur kompania ku ta hasi aplikashon pa promé biaha na luna di yüli mester hasi esaki via di e portal. Pa kualke informashon relashoná ku e aplikashon i su proseso por aserká e helpdesk di NOW pa medio di mail, ku ta now@fondodisosten.org.
