Portal pa sosten finansiero na empresario individual ta sera definitivamente - Informashon tokante Gobièrnu di Kòrsou Bo opinion

Notisia

Portal pa sosten finansiero na empresario individual ta sera definitivamente

Geplaatst op 08 June 2020 dor di Ministerio Desaroyo Ekonómiko

WILLEMSTAD- Empresarionan individual tin te ku djadumingu 14 di yüni próksimo pa yena nan petishon pa risibí sosten finansiero. Despues di e fecha aki e portal ta sera permanente. Tur petishon risibí promé ku klousura di e portal ta keda atendé debidamente.

Na nòmber di Gobièrnu di Kòrsou, Ministerio di Desaroyo Ekonómiko (MEO) ta enkargá ku implementashon di pago di sosten finansiero na empresarionan individual. Un empresario individual ta un persona ku ta manehá un empresa su so òf ta ehersé un profeshon independiente.

Na e momentunan aki MEO ta trahando duru pa asina terminá di prosesá tur petishon pendiente pa lunanan di aprel i mei, pa asina inisiá ku pagonan di yüni. Sinembargo, manera ya a keda anunsiá anteriormente, e portal ta sera definitivamente entrante djadumingu awor 14 di yüni.

Riba e fecha aki, empresarionan individual ku no a hasi esaki ainda, tin te ku 23:59’or pa entregá e petishon pa sosten finansiero via di www.fondodisosten.org. Pues despues di e fecha aki no ta tuma petishonnan nobo pa e kategoria aki di sosten finansiero.

MEO ta bolbe rekòrdá tur empresario individual ku anteriormente ya a yena e petishon aki, ku no ta nesesario bolbe yena esaki mas ku un biaha. Tambe MEO ta hasi un apelashon na empresarionan ku a risibí un mail den kual ta indiká ku nan petishon tabata falta dokumento i/òf informashon, pa por fabor kompletá esaki mas pronto posibel, di moda ku por kaba di prosesá tur petishon.

Ministerio konserní