Portal pa sosten na empresarionan individual i portal di NOW ta habri pa luna di ougùstùs - Informashon tokante Gobièrnu di Kòrsou Bo opinion

Notisia

Portal pa sosten na empresarionan individual i portal di NOW ta habri pa luna di ougùstùs

Geplaatst op 26 August 2020 dor di Ministerio Desaroyo Ekonómiko

WILLEMSTAD- Ministerio di Desaroyo Ekonómiko (MEO), na nòmber di Gobièrnu di Kòrsou , ta enkargá ku implementashon di pago di sosten finansiero na entre otro empresarionan individual i e pago di sosten pa supsidio di salario na empresanan ku a hiba pèrdida finansiero a konsekuensia di e pandemia di COVID. Di e forma aki MEO ta anunsiá ku ámbos portal ta habrí atrobe pa trata petishonnan pa luna di ougùstùs.

For di luna di aprel te ku yüli di e aña aki, Gobièrnu di Kòrsou a risibí un total di 4.604 petishon pa sosten finansiero na empresarionan individual, ku ta representá un kantidat di 3.508 kompania. Un empresario individual ta esun ku ta manehá un empresa su so òf ta ehersé un profeshon independiente. Tambe e tin kontròl por kompletu di e empresa òf e profeshon individual ku e ta ehersé i e ta karga tur riesgo finansiero pa ku esaki.
Mayoria di e empresarionan ku a yena un petishon pa sosten finansiero ya a risibí esaki, miéntras solamente 771 di e petishonnan aki a keda rechasá òf e empresario mes a kanselá su petishon.
Meskos ku tabata e kaso pa petishonnan di luna di yüli último, e empresario individual ku kier hasi petishon pa risibí sosten pa luna di ougùstùs lo mester tin tur su dokumentonan na òrdu. E empresario ku ta apliká pa promé biaha , mester por entregá komprobante ku e ta registrá tantu na Kámara di Komersio komo tambe na Ofisina di Impuesto.
Den kaso di petishonnan pa e areglo di NOW, Gobièrnu di Kòrsou a risibí entre luna di aprel te ku yüni 2020 un total di 3,311 aplikashon di kompanianan di kua 2,546 a keda aprobá pa risibí pago despues di un proseso di kontrol i tin algun petishon ainda den tratamentu. Ophetivo di e areglo di NOW ta, pa mantené mayoria di e mas òf ménos 18.000 kuponan di trabou dor di supsidiá un parti di salario na su trahadónan ya asina esaki no mester pèrdè su trabou komo konsekuensia di e pèrdida finansiero ku e kompania a hiba.
E kompania ku bini na remarke por risibí te ku 60% di e pèrdida di entrada ku su kompania a hiba i e trahadó ta firma serka su doño di trabou ku esaki ta bai di akuerdo pa entregá 20% di su banda riba e salario bruto mensual. E porsentahe mínimo di pèrdida di entrada pa por bini na remarke na luna di ougùstùs ta 25%.
Apesar ku diferente kompania/empresario poko poko ta lantando bèk riba pia despues di toke de keda di hinter dia , Gobièrnu ta konsiente ku e situashon ekonómiko ainda ta delikado pa hopi kompania.
Pa e motibu aki a yega na e desishon pa sigui ku e sosten finansiero na empresarionan individual i areglo di NOW na kompanianan pa luna di ougùstùs tambe. Esaki ta posibel ainda for di fondonan ku a sobra di e di dos tranche di fiansa ku Hulanda a manda.
Pa esnan ku tin mester di informashon adishonal tokante kualke un di e sostennan disponibel aki, por lesa e splikashon di esaki riba e página di wèp di Fondo di Sosten (www.fondodisosten.org) promé ku apliká.
Ámbos portal ta habri pa petishonnan nobo entrante, mañan , djaweps awor 27 di ougùstùs pa 8’or di anochi i ta sera djaweps 3 di sèptèmber 8’or di anochi .
Solamente empresario/kompanianan ku mester hasi un petishon pa promé biaha mester yena e formulario kompletu riba e página di fondo di sosten. Tur empresario/kompania ku anteriormente a risibí sosten finansiero sea via e areglo di NOW òf e sosten na empresarionan individual, ta risibí un link via mail pa asina hasi adaptashonnan nesesario den nan aplikashon i/òf sifranan di e luna aki.

 

Ministerio konserní