Posibilidat di repatriashon pa Venezolanonan riba 10 yüli 2021 - Informashon tokante Gobièrnu di Kòrsou Bo opinion

Notisia

Posibilidat di repatriashon pa Venezolanonan riba 10 yüli 2021

Geplaatst op 15 June 2021 dor di Ministerio Hustisia

WILLEMSTAD – Ministerio di Hustisia konhuntamente ku Direktorado di Relashonnan Eksterior ku koperashon ku Kònsùl di Venezuela ta hasi esfuerso pa por ehekutá un buelo di repatriashon riba 10 di yüli benidero si tin sufisiente interes.

Na e momentunan akí tin vários Venezolano na Kòrsou ku debí na diferente faktor ta deseá di regresá nan pais. Aparte di esaki, tin personanan prosedente di Venezuela ku na e momentu akí ta detené en espera di regreso pa nan pais despues di a trata di drenta Kòrsou di forma indokumentá òf – ku despues di a drenta di forma legal – no a hasi e petishonnan nesesario pa estadia legal i konsekuentemente a bini den kontakto ku Hustisia. Aktualmente, ainda no tin buelo komersial entre Kòrsou i Venezuela ku por fasilitá e personanan akí regreso pa nan pais.

En bista di esaki, Minister di Hustisia ta den kombersashon ku Kònsùl di Venezuela pa

logra realisá un buelo humanitario pa dia 10 di yüli próksimo. Por lo pronto pasashinan ta na benta te ku 30 di yüni prόksimo pa 6’or di atardi na Curaçao Handling Agent den Pietermaai Parking Mall na un preis di Naf 436,– inkluso airport tax. Pa e buelo akí lo tin un kantidat di lugá disponibel. Un PCR-test di 48 ora promé ku e buelo, ku ta demostrá ku e persona konserní a tèst negativo pa Covid-19, ta eksigí.

Ta bon pa remarká ku Venezolanonan ku pa un òf otro motibu a drenta Kòrsou na forma ílegal, lo no bini na remarke pa e trayekto di “Integrashon Responsabel”. Si e personanan akí disidí di biaha boluntariamente i no a risibí un desishon di ekspulshon anteriormente, nan lo no risibí un desishon ministerial di ekspulshon (verwijderingsbeschikking). Konsekuentemente, no lo prohibí nan pa regresá Kòrsou denter di 3 aña i lo por hasi un petishon pa estadia legal despues di a bandoná Kòrsou.

Si tin residente di Kòrsou ku ainda ta pegá na Venezuela, nan tambe por hasi uso di e buelo akí i laga kumpra nan ticket serka Curaçao Handling Agent. Den kuadro di desaroyonan pa loke ta Covid-19, nan lo mester tene kuenta ku e reglanan vigente pa drenta Kòrsou manera deskribí riba www.gobiernu.cw.


Ministerio konserní