Publiká riba 09 Ougùstùs 2021
WILLEMSTAD – Ministerio di Hustisia konhuntamente ku Direktorado di Relashonnan Eksterior i den koperashon ku Kònsùl di Venezuela, ta hasi tur esfuerso pa por ehekutá un buelo di repatriashon 11 di sèptèmber benidero si tin sufisiente interes.
Na e momentunan akí tin vários Venezolano na Kòrsou ku debí na diferente faktor ta deseá di regresá nan pais. Aparte di esaki, tin personanan prosedente di Venezuela ku aktualmente ta detené en espera di regreso pa nan pais, despues di a trata di drenta Kòrsou di forma indokumentá òf ku – despues di a drenta di forma legal – no a hasi e petishonnan nesesario pa estadia legal i konsekuentemente a bini den kontakto ku Hustisia.
Awor akí no tin buelo komersial ainda entre Kòrsou i Venezuela ku por yuda e personanan akí regresá nan pais. En bista di esaki, Minister di Hustisia ta den kombersashon ku Kònsùl di Venezuela pa logra realisá un buelo humanitario pa dia 11 di sèptèmber próksimo. Por lo pronto pasashinan ta na benta te ku 2 di sèptèmber prόksimo pa 6’or di atardi na Curacao Handling Agent situá den Pietermaai Parking Mall, na un preis di Naf 436,- inkluso ‘airport tax’. Pa e buelo akí lo tin un kantidat di lugá disponibel.
Un prueba di tèst di PCR di 48 ora promé ku e buelo, ku ta demostrá ku e persona konserní a tèst negativo pa Covid -19, ta obligatorio. Na yegada na Venezuela tambe tin ku pasa un PCR-tèst. Esaki lo kosta U$ 60 i mester hasi e pago adelantá na momentu ku kumpra e pasashi.
Ta bon pa remarká ku Venezolanonan ku pa un òf otro motibu a drenta Kòrsou na forma ilegal, lo no bini na remarke pa e trayekto di ‘Integrashon Responsabel’. Si e personanan akí disidí di biaha boluntariamente i no a risibí un desishon di ekspulshon anteriormente, nan lo no risibí un desishon ministerial di ekspulshon (verwijderingsbeschikking). Konsekuentemente, no lo prohibí nan pa regresá Kòrsou denter di 3 aña i nan lo por hasi un petishon pa estadia legal despues di a bandoná Kòrsou.
Si tin residente di Kòrsou ku ainda ta pegá na Venezuela, nan tambe lo por hasi uso di e buelo akí i laga kumpra nan ticket serka Curaçao Handling Agent. Den kuadro di desaroyonan pa ku Covid-19, nan lo mester tene kuenta ku e reglanan vigente pa drenta Kòrsou ku ta deskribí riba www.gobiernu.cw.
