Posibilidat di repatriashon pa Venezolanonan riba 21 desèmber 2021 - Informashon tokante Gobièrnu di Kòrsou Bo opinion

Notisia

Posibilidat di repatriashon pa Venezolanonan riba 21 desèmber 2021

Geplaatst op 03 November 2021 dor di Ministerio Hustisia

Willemstad – Ministerio di Hustisia konhuntamente ku Direktorado di Relashonnan Eksterior i ku koperashon di Kònsùl di Venezuela, ta hasi esfuerso pa por ehekutá e último vuelo humanitario pa aña 2021 pa Venezuela dia 21 di desèmber próksimo, si tin sufisiente interes.

Na e momentunan aki tin vários Venezolano na Kòrsou ku, debí na diferente faktor, ta deseá di regresá nan pais. Un yamada ta bai na personanan ku den pasado a risibí un dekreto di ekspulshon, i ku pa motibu di falta di konekshon komersial no a bandoná pais, pa nan hasi uso di e vuelo aki. Tambe ta urgi personanan ku no a risibí dekreto di ekspulshon i ta indokumentá pero ku no por hasi uso di e trayekto pa ‘Integrashon Responsabel’, pa hasi uso di e vuelo aki pa bandoná pais di un forma boluntario i mantené e derecho pa hasi un petishon di pèrmit den eksterior.

Aktualmente, ainda no tin vuelo komersial entre Kòrsou i Venezuela ku por fasilitá e personanan aki regreso na nan pais. E último vueloi su destinashon lo ta e aeropuerto di ‘Las Piedras’. En bista di e prosesonan pa ehekutá e vuelo, benta di pasashi ta tuma lugá te ku 5 di desèmber 2021. Pasashinan ta na benta te ku 5 di desèmber prόksimo pa 6or di atardi na Curaçao Handling Agent na Pietermaai Parking Mall na un preis di Naf 436,–. inkluso impuesto. Pa e vuelo aki tin un kantidat di lugá limitá disponibel.

Ta eksigí un prueba di tèst di PCR, máksimal 48 ora promé ku e buelo, ku ta demostrá ku e persona konserní a tèst negativo pa Covid -19. Na yegada na Venezuela tambe tin ku pasa un PCR tèst. Esaki ta kosta U$ 60 i e pago mester sosode adelantá ora ta hasi kompra di pasashi.

Ta bon pa remarká, ku Venezolanonan, ku pa un òf otro motibu a drenta Kòrsou di un formal ilegal, no ta bini na remarke pa e trayekto di ‘Integrashon Responsabel’. Si e personanan aki disidí di biaha boluntariamente i no a risibí un desishon di ekspulshon anteriormente, nan lo no risibí un desishon ministerial di ekspulshon (‘verwijderingsbeschikking’). Konsekuentemente, pa nan ta prohibí pa regresá Kòrsou denter di 3 aña. Nan por hasi un petishon di pèrmit pa estadia legal despues di a bandoná Kòrsou.

Residente di Kòrsou ku ainda ta pegá na Venezuela, tambe por hasi uso di e vuelo aki. Nan por laga kumpra ticket serka Curaçao Handling Agent. Si un persona di nashonalidat Venezolano, ku no ta residente di Kòrsou, a risibí un kontesta positivo pa nan pèrmit di estadia, nan tambe por hasi uso di e vuelo. Ta importante si pa apliká mesora pa e visa di entrada pa asina por risibí visa na tempu.

Den kuadro di desaroyonan pa ku Covid-19 nan lo mester tene kuenta ku e reglanan vigente pa entrada, ku ta deskribí riba www.gobiernu.cw

Ministerio konserní