Posishon di Gobièrnu di Kòrsou ta resultá den mas tempu pa yega na un akuerdo di kresementu ku Hulanda - Informashon tokante Gobièrnu di Kòrsou Bo opinion

Notisia

Posishon di Gobièrnu di Kòrsou ta resultá den mas tempu pa yega na un akuerdo di kresementu ku Hulanda

Geplaatst op 14 June 2019 dor di Ministerio Asuntunan General i Promé Minister

WILLEMSTAD – Durante di un konferensha di prensa ekstraordinario – usando medionan digital – e delegashon di Gobièrnu di Kòrsou a duna bibu i direkto for di Hulanda un relato tokante e último desaroyonan relashoná ku un posibel instrukshon pa Kòrsou.

Despues di e reunion ku Konseho di Minister di Reino, kaminda a yega na un akuerdo ku ta posponé e desishon si ta yega asina leu pa duna instrukshon, Promé Minister Rhuggenaath a duna un resumen di tur suseso ku a tuma lugá inisialmente na e reunion aki. Klave den e proseso aki tabata e kombersashonnan ku a tuma lugá ku Sekretario di Estado di Asuntunan Interior i Relashonnan di Reino Raymond Knops, kaminda Kòrsou ya por a kuminsá trese su posishon dilanti. Esaki a resultá den un invitashon personal di sr. Knops pa risibí e delegashon di Gobièrnu di Kòrsou na Hulanda, asina por sigui kombersá personalmente ku otro.

Minister Suzy Camelia-Römer seguidamente a duna un splikashon riba kontenido i konsekuensia di e desishon di awe, tantu riba tereno hurídiko komo pasonan ku Gobièrnu di Kòrsou awor mester bai tuma. Minister Camelia-Römer a pone énfasis un biaha mas riba posishon di Gobièrnu di Kòrsou pa mustra Hulanda ku Kòrsou no ta mira nesesidat di un instrukshon. Gobièrnu di Kòrsou den e kaso akí a trese kla dilanti ku e pakete di un akuerdo di kolaborashon pa ku e Strategia di Kresementu kombiná ku un instrukshon, manera Hulanda ta proponé, no por bai huntu. Konsekuentemente Gobièrnu di Kòrsou a duna di konosé ku si resultá ku Kòrsou finalmente haña un instrukshon, Kòrsou lo bai den apelashon.

Minister Kenneth Gijsbertha, ampliando riba loke e otro Ministernan a trese dilanti, finalmente a duna un breve splikashon di akshonnan ku Gobièrnu di Kòrsou mester bai tuma pa ku e reformenan nesesario. Tin diferente paso ku Gobièrnu ya a kuminsá tuma i awor ta importante pa sigui kana e kaminda ku dedikashon i determinashon, saliendo for di nos Strategia di Kresementu. Prinsipal den esaki ta pa huntu ku Hulanda hasi bon uso di e periodo benidero, promé ku e siguiente reunion di Konseho di Minister di Reino riba 5 di yüli próksimo, pa yega na un areglo ku ta enserá palabrashonnan konkreto kon ta bai implementá e reformenan struktural nesesario ku sosten di Hulanda.

Ministerio konserní