Notisia

WILLEMSTAD – Premio Cola Debrot ta un premio riba tereno kultural ku for di 1968 Gobièrnu di Kòrsou ta otorgá anualmente na un persona òf organisashon ku a hasi trabounan meritorio riba tereno di arte. Kada aña un kategoria ta na turno pa por risibí e premio. E diferente kategorianan ta: Músika, Baile, Teatro, Literatura, Siensia, Arte Visual i Arkitektura. E aña akí ta toka turno na e kategoria di “Teatro”.

E proseso pa yega na un proposishon di e persona ku lo risibí e premio, ta keda enkaminá pa Konseho Kultural Kòrsou ku e aña akí tambe a hasi un tremendo trabou pa medio di skohe un hurado i presentá un nominado na Minister di Enseñansa, Siensia, Kultura i Deporte (ESKD) sr. Eugene Rhuggenaath ku na su turno ta hasi e proposishon na Konseho di Minister. Tur aña di nobo Konseho Kultural Kòrsou ta instituí un komishon di hurado independiente pa skohe e ganador di e prestigioso premio. Gobièrnu di Kòrsou ta hasi uzo di e oportunidat akí tambe pa gradisí Konseho Kultural Kòrsou i e kuerpo di hurado pa e trabou desplegá.

Ku masha orguyo Gobièrnu ta partisipá na e pueblo di Kòrsou ku e Premio Cola Debrot di 2020 lo keda otorgá na sra. Laura Quast pa su gran esfuerso brindá riba tereno di Teatro. Konseho di Minister a ratifiká e proposishon akí i ta felisitá Laura Quast ku e echo balioso akí. Despues ku e desishon a keda ratifiká pa Konseho di Minister, Minister di ESKD sr. Eugene Rhuggenaath a tuma kontakto telefónikamente ku sra. Laura Quast pa dun’é e grato notisia. Durante di e kòmbersashon Minister a gradisí Laura pa su aporte na nos desaroyo kultural, spesialmente ekpreshon artístiko pa medio di teatro, kuenta verbal i preparashon di dosentenan riba tereno di arte dramátiko. Tambe Minister a gradisí Laura di kurason pa e liderasgo demostrá i e ehèmpel ku el a duna komo siudadano enkurashando nos akadémikonan pa regresá Kòrsou, pa medio di su obra titulá “Bai pa bini bèk”. Gratitut a keda demostrá tambe pa e echo ku Laura a i te ahinda ta duna guia na futuro artístanan. Algu masha spesial ku Minister ke infatisá ta e echo ku durante di krisis di COVID-19, Laura a sigui duna su kontribushon ku kuentanan pa nos muchanan lesa, trahando for di kas.

Pa medio di esaki Gobièrnu di Kòrsou un bes mas ta gradisí sra. Laura Quast pa e echo di kere den Kòrsou, kere den positivismo, duna di su parti pa yuda konstruí nos pais di un forma sano i tambe pa yuda guia un gran parti di nos komunidat den e proseso di ekspresá nan mes pa medio di Teatro. E dedikashon i forsa kreativo desplegá pa Laura ta ehèmpel di loke nos komunidat mester pa sali dilanti den e tempunan difísil ku nos ta konfrontando. Ekspreshon artístiko i ekspreshon en general ta importante pa desaroyo di hende.

Premio Cola Debrot ta konsistí di un boton di oro representando e flor di laraha, un sertifikado i un suma di plaka. Gobièrnu di Kòrsou ta partisipá ku pa motibu di e situashon di e pandemia di COVID-19, entrega di Premio Cola Debrot ku anualmente ta tuma lugá riba 4 di mei (fecha natal di Nicolaas (Cola) Debrot), ta keda posponé. Gobièrnu di Kòrsou ta pidi pueblo pa keda pendiente di e fecha nobo di entrega.

—

KOMUNIKASHON