Notisia

Premio Cola Debrot 2023 ta keda otorgá na sra. Ellen Spijkstra

Willemstad – Gobièrnu ta anunsiá ku Premio Cola Debrot di 2023 ta keda otorgá na sra.Ellen Spijkstra pa su esfuersonan grandi brindá riba tereno di Arte Visual.  Minister di Enseñansa, Siensia, Kultura i Deporte (ESKD) sr. Sithree van Heydoorn, Direktor di Sektor di Kultura i Deporte sra. Lizette Sambo-Velder huntu ku representante di Konseho Kultural Kòrsou a bishitá sra. Ellen Spijkstra pa partisipá esaki.

Konseho Kultural Kòrsou ta instituí komo un komishon independiente pa skohe e ganadó di e prestigioso premio aki. E aña akí Konseho Kultural Kòrsou a presentá sra. Ellen Spijkstra komo nominado pa risibí e premio. Konseho di Minister a ratifiká e proposishon aki i Gobièrnu di Kòrsou ta yama danki na Konseho Kultural Kòrsou pa un tremendo trabou.

Premio Cola Debrot ta un premio riba tereno kultural ku for di 1968 Gobièrnu di Kòrsou ta  otorgá anualmente  na un persona òf organisashon ku a hasi trabounan meritorio riba tereno di arte. Kada aña un kategoria ta na turno pa risibí e premio.  E kategorianan ta: Arkitektura, Arte Visual, Baile, Folklor, Literatura, Músika, Teatro i Siensia. E aña aki a toka turno na e kategoria di “Arte Visual”. Premio Cola Debrot ta konsistí di un boton di oro representando e flor di larahá, un sertifikado i un montante di ANG. 5000,00.

Minister di ESKD sr. Sithree van Heydoorn ta felisitá i gradisí sra. Spijkstra pa kere den Kòrsou. Danki na sra. Spijkstra pa a representá Kòrsou ku su arte i talento na diferente pais na mundu i a pone Kòrsou su nòmber na altu den kada pais ku el a bishitá. Sra Spijkstra ku su talento i positivismo a duna di su parti pa yuda konstruí nos pais di un forma sano. Tambe pa yuda guia un gran parti di nos komunidat pa nan por ekspresá nan mes pa medio di e diferente forma di arte visual.

—

KOMUNIKASHON